Dikarang Rengenyan Labang//
KUCHING: Perintah benung bejalaika Model Baru Ekonomi Luar Bandar (MBELB) ti bisi 10 iti chara Strategik, dikena ngenukuka ekonomi menua pesisir ulih maju sereta besemekih.
Menteri Muda Ekonomi Menua Pesisir (Kandang Menua Ulu) enggau Kebun Bedandang Besai), Datuk Francis Harden Hollis madah, entara 10 chara Strategik baka ngemansangka aktiviti ekonomi ti berega tinggi, ngenegapka peluang baru enggau ke udah bisi, optimum nguna tanah, ngangkatka kualiti modal mensia menua pesisir enggau ke bukai.
“Dikena ngenukuka projek enggau program ekonomi di baruh MBELB ulih dipejalaika enggau lanchar, perintah udah sereta deka terus ngenegapka Penyikap Infrastruktur Menua Pesisir (RBI) ti nyadi ‘pra-syarat’ pemansang ekonomi di kandang menua pesisir.
“Projek infrastruktur enggau infostruktur tu ulih nyukung enggau mantu transformasyen ekonomi lebih tegap sereta holistik.
“Dibaruh Pemujur Besai Menua (NKRA) – dikena ngenegapka RBI, perintah udah nyendiaka perengka guna mensia mayuh baka jalai alun, ai, elektrik enggau rumah ngagai peranak di menua pesisir nyengkaum ba sitak Kunsil Nengeri (DUN) Engkilili,” ku iya.
Harden mansutka pekara nya lebuh ke nyaut tanya ari Johnichal Rayong Ngipa (BN – Engkilili) ba Sesi Tanya Saut maya baum Penggal Keterubah Aum Kunsil Nengeri (DUN) Sarawak Ke-18, ti diatur ba Kompleks DUN ditu, pagi kemari.
Nitihku Harden, RBI deka chakah agi dipejalaika dalam Langgur Pemansang Malaysia Lumpar Ke-11 (RMK-11).
Berindik ari pekara nya, Harden madahka ba DUN Engkilili dalam RMK-11 perintah deka bejalaika sekeda projek pemansang RBI baka jalai alun, Bekal Elektrik Menua Pesisir (BELB) enggau Bekal Ai Beresi Menua Pesisir (BALB).
Nambahka nya ku iya, dikena nyungkakka tikas pengidup rayat dalam DUN Engkilili, Harden madahka mayuh program ekonomi ke ulih dipejalaika peranak dalam sitak nya.
Ba sitak DUN Engkilili entara projek infrastruktur ti diperambu dipejalaika dibaruh RMK-11 iya nya Jalai Ulu Skrang Fasa 2 ti dipelaba begunaka ungkus belanja RM28.5 juta, Projek BELB ti mungkur 22 rumah panjai (belanja dipelabaka RM11.2 juta) enggau Projek BALB ti meri penguntung ngagai 1,572 ruang bilik sereta anggar belanja dipelabaka RM139.6 juta, ku Harden.
Entara projek ekonomi ke udah diperambu dipejalaika dibaruh RMK-11 ku Harden, baka Projek Nanam Getah Baru ba tanah pemesai 4,453 hektar nyengkaum di Lubok Antu ke dipejalaika Opis Betanam Betupi Sarawak, Projek Nanam Baru Kelapa Sawit (4,000 hektar) enggau Projek Nanam Baru Kelapa Sawit ba tanah pemesai 5,000 hektar ke dipejalaika SALCRA.
“Ke diatu urung 50 peratus kandang endur dalam sitak DUN Engkilili udah ulih ngasaika bekal ai beresi, lalu bepelasarka projek ke diperambu dalam RMK-11 projek BALB nya ila deka ulih mungkur urung 85 peratus.
“Kelimpah ari projek nanam getah enggau sawit, ba DUN Engkilili ulih dipejalaika projek nanam lada, koko, buah, sayur enggau projek nanam padi,” ku Harden lebuh ke nyaut tanya tambah ari Rayong.