MIRI: Peranak rumah panjai Lepong Ajai ensanus bisi ngangauka ex-Kaban Kunsil Nengeri (ADUN) Marudi Datuk Sylvester Entri Muram bejadika pengawa Ngintu Taba rumah panjai baru sida sereta meri terima kasih ngagai pengawa ke udah digaga iya ungkup konsitituensi nya sekumbang 20 taun ke udah.
Tuai rumah panjai, Anthony Ladi madahka Sylvester Entri udah mai mayuh pemansang ungkup peranak Lepong Ajai lalu kitai patut meri terima kasih sereta basa ngagai semua pengawa ke udah digaga iya ngelama tu.
“Kami deka meri besai terima kasih ngagai Sylvester Entri ketegal bantu iya nyaup peranak Lepong Ajai ngulihka taba tanah enggau pengawa nasih tanah serera mega komuniti di Marudi lalu kami ngarapka iya terus mujur dalam pengidup,” ku Tuai Rumah Anthony Ladi, ngelaluka penatai Sylvester Entri ngagai pengawa sehari nya.
Nitih ku Anthony, Sylvester Entri udah meri geran penyampau RM250, 000 ungkup pengawa nasih tanah taba baru rambau iya agi nyadi pengari rayat lalu iya udah ngamatka semaya diri nyaup kami, nya alai kami meri terima kasih ngagai pemujur pengawa iya.
Ku iya, pengawa nasih tanah ba taba rumah panjai baru udah digaga dulu agi sebedau pengawa bepilih lalu kami semina ulih ngagauka iya pengudah belepa ari pengiruh rambau pengawa bepilih.
Ku Anthony nambah, rumah panjai nya deka terus minta skim duit jali ari Opis Menteri Pengawa Berumah.
Berebak enggau nya, iya meri Selamat Gawai Dayak ngagai Sylvester Entri sereta peranak rumah panjai ke bukai ti bisi datai rambau pengerami nya.
Ba kenang ke bukai, Sylvester Entri mega meri besai terima kasih ngagai peranak Lepong Ajai laban udah ngangauka iya bejadika taba rumah panjai baru sida taja iya nadai agi nyadi pengari rayat di Marudi.
Ku iya, tu ngayanka gempung enggau ngereja pengawa begulai entara peranak rumah panjai ngenataika asil alai taba baru sida udah bisi lalu pengawa udah tu ngaga rumah panjai baru enggau langkar ke menyana.
“Aku berasai lantang enggau kerejasama peranak rumah panjai ti bebendar neruska pengawa ngaga rumah panjai sida lalu meransang sida terus nyukung perintah Barisan Nasional (BN) ke diatu,” ku iya.
Iya mega nyempelah madah diri deka terus gawa ke rayat tang ukai nyadi pengari rayat diatu tang nyadi ketuai ba tanggungpengawa bukai.
Entri ke mega nyadi Chairman NAFAS madah, diatu iya ulih numpuka pengawa diri mantu rayat dalam pemansang pengawa betanam betupi enggau ngelakuka pengawa nya ba rumah panjai enggau tumpuk pendiau ngambi pulaika pemaik ngagai rayat dalam timpuh panjai.
Iya mega meransang rayat terus gawa begulai enggau perintah BN ke diatu ungkup pemaik ngagai rayat ke agi tubah begunaka mayuh pemansang di konstituensi Marudi.
“Aku deka meri terima kasih ngagai bala rayat di Marudi ti udah meri sukung nadai bebagi kenyau ari 20 taun ke udah sereta meri selamat Gawai Dayak ngagai komuniti Iban lalu Selamat Berpuasa ngagai bala muslim,” ku iya nampung.
Entri mega ngena awak iya begulai enggau peranak rumah panjai ngintu pengerami Gawai Dayak di Lepong Ajai.