SIBU: Sebengkah kes ngerumpak ba tasik bisi nyadi ba tebing tasik Sarawak entara Mukah enggau Bintulu kena lemai Hari Empat tu tadi pengudah kapal tunda enggau tungkang ti ngundan semilan iku pelaut besatup enggau perumpak ke dipelaba raban penyelawai ngena dua buah bot.
Minyak sawit sepenyampau 3,900 tan udah dirumpak.
Ripot polis udah digaga penulung menijar kompeni nya ba Sandakan kena lemai Hari Enam tu tadi.
Polis Tasik di Sarawak udah nya dipadah lalu staf sida di Mukah digerah gawa lalu tetemuka kededua bot ti dirumpak ba tebing tasik besemak enggau Balingian urung pukul 8.20 malam.
Kapal tunda enggau tungkang ke dirumpak nya udah ditejuka anyut sepengudah iya dirumpak kena Hari Empat tu tadi lalu ditarit pulai ngagai Bintulu sereta bala pelaut selamat magang.
Piak polis di Sarawak diatu benung mansik kes nya.
Sebedau penusah nyadi, tungkang enggau kapal tunda bekejang ari Palan Penyangkai Kapal Kidurong urung pukul 1 ngalih hari kena Hari Empat tu tadi sereta ngundan minyak sawit deka ngelawa Pengkalan Kelang.
Dipelabaka pejalai kapal dalam timpuh seminggu.
Penusah nyadi dipelaba urung sejam pengudah sida bekejang ari Pengkalan Kapal Kidurong.
Endur penusah tu nyadi nadai dikenuku tang dipelaba nyadi ba tebing tasik entara Bintulu enggau Mukah.