PENGINGAT SEBEDAU GAWAI: Buda (tiga ari kanan) rambau ngulu sebengkah pengerami di Padang Merdeka, Kuching bedau lama tu tadi.
KUCHING: Nyerumba Hari Gawai ke deka diintu Hari Tiga tu ila, tinjau Utusan Borneo kemari mandangka palan bebeli barang nyengkaum kedai besai di mengeri Kuching dedat laban mensia mayuh ti deka begiga perengka dikena nyambut hari besai nya.
Mensia mayuh lebih agi komuniti Dayak beambi ulih ba pemisi ujung minggu, bebelika perengka ke diguna nyengkaum ai irup enggau pemakai baik ke nya dikena ngintu di mengeri tauka dibai pulai ke menua.
Kelimpah ari nya, Terminal Bas Kuching Sentral mega didedat ke alai mensia mayuh kelebih agi bansa Dayak berengkah mulaika diri ke menua ngerami Hari Gawai enggau bala kaban.
Ungkup seiku atlit Malaysia, Ronny Buda, 43, pengerami Gawai serak tu dikena iya begusung ngagai bala kaban sereta kaling bukai kelebih agi sida ke diau di Sri Aman.
Atlit gumpal isi ke udah seminggu datai ba menua asal Sri Aman ari Kuala Lumpur, ngajih gawai taun tu mai pengerai enggau rezeki ngagai sida sebilik lalu pia ngagai semua bansa Dayak.
Sentang perengka ke dikena ngintu pengerami nya, Buda madah Gawai tetap diintu baka taun ke udah.
“Ngajihka gawai serak tu baka taun ke udah, kitai begulai ngerapitka kaul enggau kaban sereta kaling ke bukai.
“Engka sekeda nya udah lama enda enggau betemu, tu mih maya kitai begusung ngagai pangan diri, betanya rita enggau bekunsi cherita,” ku iya.
Sepemanjai karier nyadi atlit Malaysia, Buda mayuh menang gelar baik nya ba renggat nasional tauka ba Asia.
Iya diatu benung nyikap diri napi Lumba Sea 2017.