Belanja nya deka dikena pesereta nyediaka mayuh agi produk ungkup bazar Gawai taun dudi
MIRI: Gerempung Gagasan Anak Dayak Sarawak (GADS) ngarapka ejensi sereta opis bekaul enggau pemansang dagang sereta ekonomi gerah jari ngungkupka agih belanja, sereta ngatur kus dagang ngagai bala pedagang Dayak lebih agi raban pesereta Bazar Gawai Dayak (BGD).
Presiden GADS, Vicky Gulin Shandom, madah raban pedagang Dayak beguna embing sereta bantu puku ngambika meri peransang ngagai sida ngerembaika pengawa dagang diri.
“Aku minta kasih amat-amat sereta ngarapka ejensi perintah baka Perbadanan Usahawan Nasional Berhad (PUNB); Majlis Amanah Rakyat (MARA); Tabung Ekonomi Kumpulan Usahawan Niaga (TEKUN) Nasional; Amanah Ikhtiar Malaysia (AIM) sereta Kaunsil Pemansang Pedang Bumiputera (MPUB), Opis Kepala Menteri meri bantu ari sukut belanja sereta muka kus dagang ngagai pesereta BGD, baka ke udah diberi ngagai pedagang Bazar Ramadan ninting taun.
“Agih belanja ke mimit tu, dikearapka ulih mantu bala pesereta nyadika ‘puku tumu’ dikena sida nyediaka mayuh agi produk ungkup bala temuai,” ku iya.
Iya mansutka jaku nya ba pengerami ngelanjarka BGD Miri 2016 ke tembu malam ensanus pengudah ke diatur pengelama 15 hari bepun 10 Mei tu tadu, Vicky mega madahka BGD 2017 ila deka diatur baru ba taba ke sebaka di palan paking kerita Kompleks Beli-belah Permymall (Permymall) ditu, mega kena bulan Mei.
“Pengawa tu patut diatur belama laban GADS deka nentuka juluk besai gerempung tu deka meda penyedar bansa Dayak nyerera diri ba pengawa dagang ulih dilatih bepun nengah GDB.
“Nangkan nya, tu betuju dikena nempa penyerakup ba raban bansa Dayak nengah pengawa dagang,” ku iya seraya meri pengaga ati ngarika piak GADS laban pengawa nya udah mujur nentuka raban pesereta bulih jereki ke belimpah dikena ngintu pengerami Gawai Dayak taun tu.
Berebak enggau nya, pengari pesereta Bazar Gawai Dayak, Pirit Assan ngarapka program nya ulih diatur belama ba taba ke sebaka iya nya ba palan paking kerita nya.
Kenu ku iya, palan nya ukai semina engkeman, tang kerejasama ari piak Permymall mega chukup manah lalu pekara tu disadang lebih mujur nyema Permymall dipilih nyadi taba tetap endur ngatur pengerami bazar nya.
“Asil timbal ari bala pesereta bazar mega madahka program baka pekit Kumang Gawai Nembiak enggau pengawa bejalai bebala mayuh Gawai Dayak patut diatur belama ninting taun di bazar laban iya dipeda ulih matak penatai mayuh bala temuai kitu,” ku iya.
Berebak enggau nya, Pirit mega minta komiti pengatur pengawa ngatur mayuh agi program sepanjai pengerami bazar nya, ba taun dudi ngambika bala temuai mayuh datai.