KUCHING: Penanyi Iban, Melissa Francis sebilik ti ngemeranka muzik udah nempa siti agi pemujur dalam industri muzik menua tu nengah pengawa ngelancharka album sida semenyadi ti kedua, band Hairee and Angels benama ‘Bansaku Besatu’ apin lama ke udah.
Album kedua dikeluarka kompeni Platinum World Network Sdn Bhd sereta tembu kena 30 March taun tu tadi lalu udah dilancharka ba sebengkah kedai besai ditu beserimbai enggau pengerami Gawai Dayak.
Nitih ku seiku kaban band, Hairee, album tu ngundan 10 buah lagu enggau bemacham genre muzik, ke alai peminat deka teperindang nyengkaum rentak pop, rock enggau balada, semua nya digaga sida empat menyadi.
“Kami chukup gaga ati enggau timbal ke diterima ari bala peminat kami ngelama ke udah ngaul diri dalam industri muzik Iban.
“Dikena malas pemanah sida, kami ngeluarka album baru tu enggau lagu ke chukup manah lalu aku ngarap ulih ngemuaska ati sida ti auska muzik,” ku iya.
Band Hairee and Angels ditumbuh dalam taun 2000 diarika empat iku; Hairee (gitar led), Rickee (bass), Frankee (dram) enggau Melissa, keyboard.
“Apai aku empu meri nama band tu lebuh kami keterubah begulai merindang ba sebengkah pengerami korporat di Labuan dalam taun 2000.
“Aku seruran bisi juluk ngempung semua ari pupu bansa enggau umur nengah muzik kami,” ku iya nambah.
Ku Hairee, pemansang dalam industri muzik Iban kemaya hari udah chukup meri peransang.
“Industri muzik Iban udah majak manah kelebih agi dalam sukut tusun muzik, kualiti enggau video muzik.
“Kami ngarapka diri seruran nyadi inpirasyen orang bukai terus nengkebang muzik ke menyana sereta ulih ngetanka legasi muzik Iban ngambika seruran meruan dalam ati peminat kitai,” ku iya nambah baru.
Ba pasal pemujur ti udah dijapai band nya, ku Hairee, iya ke nyadi penulis leka lagu enggau komposer lagu sida ‘Mutus Ati enggau ‘Perening’ ti udah bulih gelar Lagu Pemadu Manah (Mutus Ati) rambau Anugerah Juara Lagu Rentak Ruai Cats FM (AJARR) dalam taun 2012, sereta Silver Award for Best Rock Song (Perening) ba Voice Independent Music Award (VIMA) dalam taun 2014.
Ku Hairee nambah, Hairee and Angels suah merindang ba palan pemerindang enggau pengerami korporat di serata nengeri deka ngatur konsert ba serata Sarawak enda lama agi.
Barang sapa ke deka meli sereta nemu penerang silik pasal album nya, tau betelefon ngagai Pemesai Dagang sida, Deborah ba lumur 016-6690086. Sida mega tau ngelawa laman peminat Facebook Platinum World Network Sdn Bhd ti ngeluarka album nya.