Dikarang Rengenyan Labang//
NERANG: Dr. Sim lebuh berandau enggau raban polis IPD Padawan, seraya diperatika Ketuai Polis Pelilih (KPD) Padawan Supt Choo Yin Kok (kiba) enggau Lo (kanan).
KUCHING: Sekali agi Menteri Kaunsil Kandang Menua Datuk Prof. Sim Kui Hian minta Opis Kaunsil Kandang Menua -PBT (Opis Kaunsil Kandang Mengeri enggau Kaunsil Mengeri Besai) di nengeri tu merati sereta ngubah baru undang-undang ti nadai relevan, dikena ngenegapka PBT empu.
Iya madahka undang-undang ke mit patut diubah ngambi isu ke nyadi diatu ulih teputar, anang baka sekeda piak ke semina landik ngerara penyalah orang bukai.
“Kitai patut ngubah undang-undang mit dikena ngenegapka PBT (Opis Kaunsil Kandang Mengeri enggau Kaunsil Mengeri Besai) di nengeri tu .
“Nitih diterangka (piak polis), Batu Kawah ngembuan tikas jenayah ke tinggi tang sida nadai pemesai.
“Tu sekeda pekara ke patut diperatika kitai,(ke enda relevan patut diubah) ngambika penanggul nya ulih teputar.
“Baka ti dipadahka ngagai aku sida (polis) betapi enggau isu pengereja pengawa, ambika chunto baka polis trafik (enda chukup) dikena mutarka penanggul jalai raya ke sekut.
“Nyema isu sida pengereja pengawa, kitai ulih ngubah undang-undang PBT ngambika bisi ditumbuhka trafik warden awakka ulih mantu piak polis,” ku iya.
Dr Sim ti mega Kaban Kunsil Nengeri (ADUN) Batu Kawa mansutka pekara nya lebuh dirandau ba Indu Opis Polis Pelilih Menua (IPD) Padawan, di Siburan, kemari.
Dulu ari nya Dr. Sim disempulang ADUN Batu Kitang Lo Khere Chiang nemuai seraya bejalaika pengawa ngagai IPD Padawan ditu kemari, ngenukuka penanggul tauka isu ke nyadi dalam sitak Batu Kitang enggau Batu Kawa.
“Enti kitai ngembuan runding ke nadai bechiping, kitai nguji ngiga chara mutarka isu, sida penyakal selalu mantaika isu tang nadai mutarka isu tauka penanggul.
“Kitai kebendar enda begunaka penyakal ngenataika isu, laban orang mayuh ti deka madahka isu ngagai kitai. Nama ke deka digaga kitai iya nya ngiga chara mutarka isu tauka penanggul nengah mayuh macham ejensi.
“Pekara ti pemadu beguna iya nya nadai bechiping sereta anang bula, ukai baka penyakal ti sengaja ngenataika sekeda pekara ti amat, sebagi pekara ti amat enggau kekadang bula,” ku iya.
Kelimpah ari nya lebuh dipinta ngenang Rang Undang-undang Persendirian (Private Bill) ba hari kepenudi aum Parlimen kemari (ensanus) ke dibantaika Datuk Seri Hadi Awang ari PAS, pasal ngenegapka Kanun Jenyah Syariah 1963, iya madahka, piak iya (SUPP) mantah undang-undang nya di Sarawak.
Iya madahka parti komponen Barisan Nasional di Sarawak patut bebendar nyaga tauka ngetanka pemutus nya.
“Ngarika SUPP, kami netap penemu sereta enggau bebendar mantah undang-undang tu laban ba Sarawak, kitai suah udah madahka, lebuh maya numbuhka Malaysia taun 1963, kitai nyain sempekat nyadi sebuah menua sekular.
“Aku berasai gaga laban Datuk Patinggi Tan Sri Adenan Satem (Kepala Menteri) enggau BN Sarawak udah suah madahka ukum Hudud sigi enda dipejalaika di Sarawak.
“Nya penegap pemutus kitai sekumbang Nengeri Kelantan ngemendarka ukum Hudud nyentukka diatu. Kitai enda berubah runding,” ku iya ti nyadi Presiden SUPP.