KUCHING: Pengundi veteran soldadu Malaysia (ATM) nengeri tu diperansang sampal nurun ngundi pagila, 7 Mei.
Ex-YDP PVATM (Gerempung Veteran Soldadu Malaysia) Tuai Rumah Spencer Birai madah, raban veteran patut bejalaika tanggungpengawa diri nyadi rayat Malaysia.
“Aku nesau semua pengundi veteran ATM nengeri tu kelebih agi ba sitak DUN Krian enggau Batu Kawa, sampal nurun ngundi pagila (7 Mei),” ku iya nengah Aplikasyen WhatApps ti dianjung ngagai Utusan Borneo.
Berebak enggau tu, iya ngarapka semua pengundi veteran di menua tu nemu berunding panjai sereta landik milih pengari ke ulih mai tauka beratka pemansang enggau pemujur menua.
Ngenang pasal DUN Krian, iya ngarapka pengundi tauka veteran ATM dalam sitak nya meri sukung enggau peluang ngagai Tim Adenan.
Pengundi patut nemu parti penyakal enda ulih megai menua Sarawak sereta enda ulih mai pemansang ba sitak ke udah diarika sida sebedau tu, ku iya.
“Nya alai aku minta semua pengundi veteran ba Krian meri sukung ngagai chalun BN. Beri mih peluang ngagai BN awakka penanggul tauka penusah kitai di menua Krian ulih diputarka.
“Laban kitai udah nemu penyakal enda ulih ngiring menua tu, nya alai kitai patut nyukung chalun BN iya nya Tim Adenan,” ku iya seraya ngarapka pengundi ba Batu Kawa meri sukung ngagai Tim Adenan.