MIRI: Menua San di ulu Baram deka diangkat nyadi pelilih mit nyema Barisan Nasional (BN) menang ba Telang Usan maya pengawa bepilih 7 Mei tu.
Bejaku pasal pekara tu, chalun BN – Parti Pesaka Bumiputera Bersatu (PBB) Telang Usan, Ngau madahka iya enggau Kaban Parlimen (MP) Baram, Anyi Ngau, ngembuan penemu ke sama sereta deka meda Baram kelebih agi di Telang Usan ngubah pengidup rayat di konstituensi tu menyana agi.
“Kami meri besai terima kasih alai chairman BN ke lalu nyadi Kepala Menteri Sarawak, Datuk Patinggi Tan Sri Adenan Satem ke udah ngangkatka Long Lama nyadi pelilih menua sereta Long Bedian nyadi pelilih mit.
“Diatu kitai ngarapka Kepala Menteri deka nyadika San nyadi kandang menua ti diuan ketebal agi bansa Kenyah di ulu Baran diangkat ngagai pelilih mit,” ku iya rambau pengawa gempuru ke udah digulu urung iya 600 iku peranak ari lapan buah rumah panjai di kandang menua San di sebengkah hotel ditu kena malam Hari Dua tu tadi.
Lapan buah rumah panjai iya nya Long Anap, Long Julan, Long Julan Pelutan, Long Apu, Tanjung Tepalit, Long Selatong, Long San enggau Long Palai.
Dennis, ke deka ngetanka penuduk nya rambau Pengawa Bepilih Nengeri (PRN) Ke-11 ngarapka 10,012 iku pengundi ke udah ngerejista diri ulih ngundi iya ngambika iya terus bejalaika pengawa ngagai rayat.
Ku iya, ba penggal keterubah nyadi pengari rayat serekat amat ngagai iya sereta iya pechaya enti sema diberi sepenggal da agi iya naka ulih deka gawa enggau penau iya mai mayuh agi pemansang ngagai Telang Usan.
“Kitai udah gawa bebendar kenyau ari pengawa bepilih kepenudi laban kitai dekaka kandang menua kitai tu dikemansang.
“Kitai berasai lantang sereta beterima kasih beratika kededua perintah nengeri enggau perintah besai ari baruh pegai BN udah mendingka peminta rayat kelebih agi sida ke diau dikandang menua pesisir baka Telang Usan,” ku iya.
Dennis mega madahka antara projek ke udah dipejalai kenyau ari iya mangku pengawa nyadi pengari rayat nangkan Senator Datuk Lihan Jok dalam taun 2011 iya nya perintah udah ngemendarka belanja nyauka penyampau RM135 juta dikena ngaga jematan Long Lama.
Kelimpah ari nya, Dennis mega bebendar bejalaika projek mikro-hidro di Long Banga ke diatu udah nyediaka bekal kuasa karan 24 jam ngagai komuniti di menua nya.
“Beberapa hari ke udah, aku udah diterangka pasal Long Palai deka ngasaika bekal kuasa karam 24 jam ari projek solar ke deka berengkah dipejalaika enda lama da agi,” ku iya.
Iya besemaya ngagai semua ke bisi datai gempuru sehari nya alai iya mega deka bejalaika pengawa ba rumah panjai ke bukai dala konstituensi nya ngambika sida mega ulih ngasaika bekal karan 24 jam sereta penyikap perengkaguna ke bukai.
“Pulai ngagai palan kita muai undi sereta undi BN kena nentuka pemansang terus dipejalaika,” ku iya nandu.
Sama bisi datai nyempulang iya rambau gempuru nya iya nya Speaker Aum Kunsil Nengeri (DUN), Datuk Amar Datuk Amar Mohd Asfia Awang Nassar, kaban ari PBB Telang Usan sereta kaban ari SPDP Telang Usan.