NYUKUNG PENGARI BN: Bala ketuai komuniti enggau kaunsilor Telang Usan meri sukung tegap ngagai tim Adenan.
MIRI: Bala ketuai komuniti enggau kaunsilor di Telang Usan nyadaka sukung nadai bebagi ngagai chalun Barisan Nasional (BN) di Telang Usan, Dennis Ngau sereta chalun terus BN di sitak Mulu, Datu Gerawat Gala.
Berebak enggau nya, sida mega nyukung Program Transformasyen Menua Pesisir (RTP) ke dilangkar Kepala Menteri Sarawak, Datuk patinggi Tan Sri Adenan Satem.
Sukung tegap nya dibantaika bala temenggong enggau urung 20 iku pemancha, bala pengulu, raban ketuai tumpuk pendiau sereta kaunsilor.
“kami nyukung chalun BN di Telang Usan, Dennis Ngau enggau chalun terus BN ungkup Mulu, Datu Gerawat Gala sereta nyukung perambu RTP ke udah dilangkar Adenan,” ku jaku penerang ari semua ketuai komuniti kemari.
Nitih ku penerangka dipansutka raban ketuai komuniti nya, sida udah begempung mantaika sukung penuh ngagai Dennis ke udah nyata ngayanka pengerurus ati, bisi tanggungpengawa sereta ngembuan mayuh peneleba nyadi pengari rayat baka ke udah dibantaika iya rambau penggal sebedau tu nyadi pengari rayat ungkup Telang Usan.
Ku bala ketuai komuniti nya, sida deka Dennis neruska program enggau projek pemansang ke diungkupka perintah BN ngagai raban komuniti Orang Ulu di Telang Usan enggau Baram.
Ku sida, Dennis udah gawa bebendar nyadi pengari rayat ngagai semua bala komuniti di Telang Usan lalu iya bejalaika pengawa nadai bepilih bulu.
Nangkan nya, bala ketuai komuniti mega mantaika sukung sida ngagai chalun terus BN di Mulu, Datu Gerawat Gala, seiku orang ke ngembuan tanggungpengawa sereta chukup mentas enggau rayat.
“Kami deka meda Dennis enggau Gerawat menang maya pengawa bepilih sekali tu ngambi pulaika pemanah ngagai komuniti Orang Ulu,” ku sida seraya ngansak peranak ke diau di Miri enggau bagi menua ngelingi mulaika diri ke menua lalu ngundi Telang Usan enggau Mulu.
Ngenang iring Kepala Menteri Tan Sri Adenan, ku sida, raban komuniti nya endang terus nyukung iya merintah di Sarawak.
Kenu ku sida, Adenan udah nempa Long Bedian enggau Mulu nyadi pelilih mit ngambika ulih bejalaika servis ke manah agi ungkup rayat ditu sereta ngaga jematan ke nyambung Long Lama ngagai komuniti Orang Ulu di kandang menua tengah enggau ulu Baram.
Gempuru tu diatur bala ketuai komuniti enggau kaunsilor Telang Usan.