PERANSANG PELAJAR: Ricky (kiba) nyuaka sekularship RM50,000 ari piak Kolej IBS Miri ngagai nembiak sekula nya ke diterima Robin Amir.
KUCHING: Kolej IBS Miri mujur meri licha peransang ngagai bala nembiak pom 5, Sekula Sekondari (SMK) Trusan, Lawas dikena sida napi peresa Sijil Pelajaran Malaysia (SPM) 2016 kena 15 April tu tadi.
Tuju program tu diatur endang nyadika peransang ngagai modal mensia peranak nengeri tu.
Pengelicha ke dikangau ngemujurka program tu iya nya Kaunsilor Program ari Kolej IBS Miri empu iya nya Ricky Donald Berji, pengelama sejam setengah.
Kelimpah meri penemu pasal chara nyeliahka diri ari tusut runding, bala nembiak mega dibai bejuraika penanggul ke suah ditapi sida nengah sesi tanya saut.
Tuju bukai program licha tu iya nya ngiri pemereti ati ngagai bala nembiak ngambika ngemeratka disiplin, penau, pengelandik, pemintar runding enggau pekara pelajar ke pulaika pemaik ngagai diri empu.
Berebak enggau nya, beserimbai enggau pengawa ngintu genap 18 taun Kolej IBS ngaul diri dalam dunya pelajar tu, piak kolej enggau temegah ati bisi nyuaka sekularship penyampau RM50,000 ngagai bala nembiak ke bisi ati nampung pelajar sida dalam Program Diploma Pengawa Nguruska Sekuriti enggau Pengelikun.
Ricky Donald ke ngarika Kolej IBS Miri nyuaka sekularchip nya ngagai Penulung Kanan Pekara Nembiak (PKHEM) SMK Trusan, Robin Amir seraya dikemata pengajar Elaine Rikan Kading enggau ke bukai.
Nangkan nya, IBS Miri diatu benung muka peminta ngiga nembiak ke bisi ati nampung pelajar ba renggat diploma enggau degree ungkup sesi Mei 2016.
Penerang silik pasal pekara tu ulih dipeda ba laman web http://www.ibs.edu.my tauka betelefon terus nuju Derell Ladi ba lumur 019-898 8862 enggau Ricky Donald (012-899 1207).