SEKULA BARU: Pendiau sebuah sekula sekondari baru ke udah tembu digaga di Opar.
LUNDU : Biawak, sebengkah sitak menua pesisir dalam kunstituensi Kunsil Nengeri (DUN) Opar, ditu ke berimbai enggau menua Kalimantan Barat bisi penau nyadi sebengkah palan baru penyungkak ekonomi di Bumi Kenyalang.
Ubah ke udah nyadi di sitak nya dalam timpuh 15 taun ke udah ari sebuah genturung pendiau ke kurang perengka guna baka bekal karan, ai enggau jalai raya diatu udah serap diberi pemansang baka Kompleks Kastam, Imigresen enggau Kuarantin (CIQ) ke nyadi penyungkak pemansang ekonomi di pelilih tu.
Kenu ku Ketuai Raban Bansa Biawak, Pemancha London Tasi, bemacham projek pemansang udah dipejalaika ditu kenyau 15 taun ke udah.
Iya ke pemadu terang dipeda penemu pengawa ngemanahka Jalai Biawak pemanjai 18.3 kilometer beungkus RM30 juta taun nyin kemari, ditar magang nyentuk ke Kampung Biawak.
London madah, tu meri penyamai ngagai urung 5,000 peranak ari 11 buah kampung sereta nyungkak sosio-ekonomi ngagai peranak menua nya.
London madah, perengka guna bukai ke udah dipejalaika di DUN Opar nyengkaum skim bekal karan menua pesisir ke meri penyamai ngagai 49 buah kampung di sitak nya.
Nangkan nya, penyandang penuduk DUN Opar ke deka bediri ngena tiket BN terus maya Pengawa Bepilih Besai Nengeri ke deka datai tu, Ranum Mina madah sebuah sekula baru iya nya SMK Senibong deka dibuka tengan taun tu.
Iya madah, kelimpah ngaga sekula sekondari enggau primari baru, sekula bukai mega deka dikemanah sereta perengka pengerai deka diangkat manah nengah pengawa ngaga klinik pengerai ke baru.
Ranum madah, CIQ Biawak ke dibuka kenyau dua taun ke udah mujur ngelancharka pengawa dagang peranak menua ke besemak ba adan Malaysia-Indonesia nya.
“Pengawa ngaga Jalai Biawak enggau CIQ Biawak endang penyungkak ekonomi ngagau kededua bengkah menua lalu aku arap bendar perambu ngatur transformasi ba sitak tu ulih dijapai,” ku iya madah ngagai Bernama.
Nangkan nya, ku iya mayuh bengkah aktiviti sosio-ekonomi bisi diatur dikena nyungkak penatai pemisi rayat ditu baka muka kebun sawit enggau getah dandang besai ditangkan pengawa dagang.
Iya madah, pengawa ngaga Jematan Kampung Selampit mega dalam perambu laban jematan nya beguna amat ke guna peranak Kampung Selampit.
Projek bukai ke benung dipejalaika diatu iya nya Palan Pemansang Kampung (RGC) Opar ke dikemansangka raban Kaunsil Penyaga enggau Pemansang Tanah Sarawak (Pelita), ku iya.
“Enti udah tembu jemah RGC Opar deka ngembuan sebuah mengeri baru, balai polis, klinik enggau Palan Giat Mara,” ku iya. — Bernama