// Dikarang Judan Bungap //
BASA: Masing dipebasa datai bejadi pengerami sehari nya.
KANOWIT: Sukung ti manah ngagai chalun Barisan Nasional (BN) -Parti Rayat Sarawak (PRS), Alexander Vincent ke deka bediri ba Kunsil Nengeri (DUN) Ngemah berupai dipeda enggau penatai urung 2,000 iku mensia mayuh ngulu Pengerami Bejadi Ijin Pengawa Bepilih Nengeri (PRN) DUN N.49 Ngemah.
Pengerami tu diatur PRS ba Rumah Daniel Rangkong, Sungai Bawan ditu, lemai kilah ensana.
Presiden PRS Tan Sri Datuk Amar James Jemut Masing dipebasa bejadika pengerami tu.
Maya ke bejaku ba pengerami nya, Masing tebal agi minta bala pengundi ba DUN Ngemah ngambika enda tepawah runding enggau isu-isu ti dikena penyakal bekimpin bejai perintah beserimbai enggau Pengawa Bepilih Besai Nengeri (PRN) Ke-11 tu.
Sama bela bisi datai nyukung pengawa tu iya nya Kaban Parlimen Kanowit Datuk Aaron Ago Dagang, chalun BN-PRS (DUN Ngemah, DUN Tamin enggau DUN Pelagus) Alexander Vincent, Ir Christopher Gira Sambang enggau Wilson Nyabong Ijang, Ex-ADUN Tamin Datuk Mauh Ikeh enggau bini Alexander, Susan Clement.
Berebak enggau pengawa tu Masing mega dipebasa nyuaka bantu ngagai Rumah Anthony Ajut ari Nanga Nirok ke udah ditinggang penusah angus, empai lama tu tadi.
Sambut mensia mayuh ngagai Alexander maya iya ke nemuai ngagai rumah panjai ba DUN nya ngelama tu berupai mandangka iya nyangka nadai tentu penanggul ngetanka penuduk nya.
Iya mega suah dipeda bejalai niki rumah panjai begulai enggau tuai raban bansa, bala tuai rumah lalu pia mega suah dipeda tuai raban bansa China bela nyempulang iya.
Maya PRN 2011, Alexander mujur bulih 2,361 iti undi ngalahka Adeh Denong ari PCM (1,366 iti undi), chalun PKR Aris Alap (650 iti undi), chalun SNAP Michael Lias (577 iti undi) enggau chalun ngati ke diri, Yakup Khalid (278 iti undi).