Sukung nya deka nentuka BN teulihka pemujur besai ba Pengawa Bepilih Nengeri Ke-11 ke deka diatur tu ila
// Dikarang Chris Bishop //
CHALUN BN: Henry (kiba) enggau Penguang (kanan) begambar enggau Presiden Parti Rakyat Sarawak (PRS) Tan Sri James Masing seraya mandangka surat watikah dichiri nyadi chalun BN di Kuching kemari.
KUCHING: Chalun Barisan Nasional (BN) di N.2 Tasik Biru Datuk Henry@Harry Jinep ngelalau penyukung penyandang penuduk nya (Datuk Peter Nansian) pulai nyukung BN.
Bejaku ngagai pengarang berita pengudah nerima surat dichiri nyadi chalun BN di Indu Opis Parti Pesaka Bumiputera Bersatu (PBB) ditu kemari, Henry madahka sukung nya deka nentuka BN teulih pemujur besai di Tasik Biru.
“Aku ngelalau semua penyukung nyengkaum raban tuai bansa bela begempung ngambi ulih nempa pemujur besai ungkup BN di Tasik Biru.
“Nengah sukung ari bala penyukung Datuk Peter Nansian, ditambah enggau penyukung ari sepiak aku. . .aku pechaya BN deka teulihka pemujur besai,’ku iya ke bediri nengah tikit Parti Progresif Demokratik Sarawak (SPDP).
Ngenang kaul ke sama, Henry besemaya deka nampung pengawa manah ke udah dikereja Nansian di Tasik Biru ngelama ke udah ungkup pemaik peranak kandang endur nya.
Ku iya, Nansian seiku ketuai ke chukup regas gawa lalu udah mai mayuh pemansang ngagai rayat.
“Nansian seruran ngemeratka pengawa ngintu pemaik orang ke seranta sereta raban orang ti begunaka bantu.
“Ditu, aku bisi mayuh kereja lalu nentuka pemanah pengawa Nansian ulih ditampung,”ku iya.
Kelimpah ari nya, orang dagang tebilang nya madah Nansian udah nyaup nentuka Tasik Biru nyadi kubu kuat BN.
Chalun BN-SPDP di Marudi, Datu Dr Penguang Manggil lebuh dikerandau mega minta rayat di kandang endur nya begempung nyukung BN.
Iya ke kala nyadi Sekretari Mendam Opis Menteri Kunsil Kandang Menua chukup pechaya rayat deka pulai ngagai BN lalu nentuka pemujur BN ba Pengawa Bepilih Besai Nengeri ke-11 (PRN11).
Penguang dichiri Kepala Menteri Datuk Patinggi Tan Sri Adenan Satem nganti penyandang penuduk N.76 Marudi Datuk Sylvester Entrie.
Nentuka rayat di Marudi sampal nyukung BN nyengkaum penyukung Entri nyadi pekara berat ti deka diadu Penguang dalam timpuh sebedau pengawa bepilih diadu.