KAPIT: Balai Dagang China Kapit udah ngatur ‘Randau Penyakit Denggi’ ba bilik aum ke diulu bala ketuai komuniti, Gerempung Ukai Dikuasa Perintah NGO enggau komuniti dagang.
Randau tu diatur berindik ari penyakit denggi ke majak nyadi urung di pasar tu kenyau ari pun bulan April. Kes denggi tu udah ditemu nyadi maya April enggau endur nyamuk tu betelu mega udah ditemu raban ke gawa ba Opis Pengerai kelebih agi ba put puang ti diengkah ba endur bebasu dalam premis enggau endur ke bukai ke ngelingi nya.
Dr Wong Tzu Hui ari Opis Pengerai Kapit enggau Pemesai Opis Pengerai Mensia Mayuh enggau Kandang Menua, Richard Nyalu udah meri licha pasal penyakit denggi ti tau ngenataika penusah. Dikena nyeliahka penyakit nya,raban ari penerit adat ba pekara pengerai udah ngatur pengawa beripai meresi kandang endur di pasar enggau kandang endur diau, ngelasi parit, ngiga sereta ngemunaska endur nyamuk betelu sereta meri penyedar ngagai mensia mayuh.
Sama bisi datai maya tu iya nya Chairman Balai Dagang China, Dato Hua Sying, Chairman Gempung Serakup China, Liew Song Swee, Chairman Gerempung kedai kupi enggau Restoren, Ngu Tze Kiong, Chairman Gerempung Foochow, Sii Bang Ee lalu ketuai komuniti ke bisi datai iya nya Temenggong Tan Kian Hoo, Pemancha Yong Thu Fook, Penghulu Wong Kie Ing, Penghulu Sia Shui Poh,Kapitan Kong Cheak Hee enggau ke bukai.