MARUDI: Penyandang Kunsil Nengeri (DUN) Telang Usan, Dennis Ngau meri lalau ngagai bala ketuai genturung pendiau (KK) ke baru dichiri patut nerang ngagai nembiak redak pasal juluk pengawa ke deka dijapai sida.
Bala ketuai tumpuk pendiau lebih agi di Telang Usan patut ngembuan mayuh penemu sereta bagas ngereja pengawa.
Nya alai, manah agi sida ke dichiri nyadi ketuai genturung pendiau tu orang ke ngembuan peneleba baka orang ke kala gawa perintah sereta bisi pelajar.
Ukai reti sida ke nadai pelajar nya enda ulih diterima nyadi ketuai, tang iya meseti diakun bala ari Opis Pelilih, nya kebuah ke ngasuh nyiri ketuai tumpuk pendiau begunaka timpuh ke panjai endur iya diputuska laban piak Opis Pelilih deka mansik sekalika iya kala ngereja penyalah bepelasarka rikod ba Indu Opis Polis di Bukit Aman, ku Dennis Ngau.
Sekeda bala ketuai ke bisi nerima Surat Chiri maya tu iya nya Tuai Kampung (TK) Gilbert Ding Wan (64) deka megai 127 pintu ruang bilik di Rumah Panjai Uma Beluvoh Long Panai di Tutoh.
Ex-pengajar Gilbert kala ngajar ba mayuh bengkah sekula di Baram enggau Bintulu; Sekula Sekondari (SMK) Long Lama, SMK Long San, SMK Tatau, Sekula Primari (SK) Datuk Temenggong Muip enggau St Joseph Miri.
“Aku meri besai terima kasih ngagai perintah Barisan Nasional enggau Dennis laban udah nyiri aku mangku pengawa tu, sereta terima kasih ngagai peranak rumah panjai ke udah mandangka sukung sida.
“Aku minta kitai terus nyukung perintah ke udah bejalaika program pemansang ngagai menua kitai,” ku Gilbert.
Udah nya, seiku agi ketuai genturung pendiau bela nerima surat chiri ungkup empat taun sepenggal, iya nya Tuai Rumah (TR) Jamit Angol, ketuai baru Rumah Panjai Sungai Stapang enggau TR Damu Ancheh nyadi ketuai Rumah Panjai Sungai Muam.
Setipikit tu disua SAO Opis Pelilih Marudi, Reagan Edwin ngarika Opis Pelilih Marudi seraya dikemata Dennis Ngau enggau Pemancha Gilbert Ding Laing.