KUCHING: Menteri Pemansang Tanah Tan Sri James Jemut Masing madahka iya enda datai ngagai ‘debat’ ti diatur ‘Sarawak for Sarawakian’ (S4S) kena 10 April di Panggung Wayang Kenyalang Park ditu.
Masing ti mega nyadi Kaban Kunsil Nengeri (ADUN) Baleh madahka iya nadai ati deka datai ngagai debat nya.
“Aku mayuh pengawa bukai ke berat agi ari debat nya. Baka debat ke deka digaga sida tu, ukai pekara ke berat. Pemerat aku enda sebaka enggau enggi iya (Peter John Jaban ke ngatur debat tu).
Lebuh ditanya baru, bisi enda iya udah nerima kad mai sereta enggau debat nya, ku Masing, iya nadai nerima.
Nitihka jaku Peter bedau lama tu tadi, lebuh nganjung surat ngagai Kepala Menteri Datuk Patinggi Tan Sri Adenan Satem mai Kepala Menteri ngagai debat nya sereta baum enggau gerempung nya, sida iya udah nganjung surat ngagai parti politik bukai nyengkaum penyakal.
“Sigi udah dijangka iya (Peter) deka ngangau semua orang, semua parti politik, nyengkaum penyukung iya.
“Aku enda datai laban bisi pemerat bukai ke deka digaga aku, awakka Peter mutuska utai ke deka digaga iya,” ku Masing.
Ba atur debat nya, parti politik baka Parti Pesaka Bumiputera Bersatu (PBB), Parti Keadilan Rakyat (PKR), Parti Tindakan Demokratik (DAP), Parti Progresif Demokratik (SPDP) enggau Parti Sa’ati Rayat Sarawak (SUPP) deka diberi peluang mantaika penemu sida ngagai mensia mayuh ke diberi timpuh 10 minit awak bejaku.
Berebak ari nya, raban politik tu mega diasuh nyaut tanya ari mensia mayuh ke bisi datai beratika polisi ke deka digaga Perintah ila dalam timpuh lima taun ke deka datai.
Ba randau nya mega, Masing ditanya pasal komen Kaban Parlimen (MP) Zuraida Kamaruddin ari PKR ti madahka seraban aktivis ke ngumbai diri enda diaku nyadi peranak menua tu ketegal ngarika orang asal Sarawak lalu nyalahka Perintah bebulaka komuniti Penan ketgal mutarka sida iya.
Ba komen Zuraidah nya mega madahka raban nya udah nganjung memorandum ngagai Opis Pengerejista Bansa (JPN) minta opis nya ngaga surat beranak sereta kad pengelala ke sida.
Dokumen nya mega bisi diberi ngagai Sapit Menteri Besai Datuk Seri Ahmad Zahid Hamidi nyengkaum sapit iya, Datuk Seri Nur Jazlan Mohamed enggau Masir Kujat.
Dalam memorandum nya madah, agi mayuh bansa Penan ti diau di menua ulu tauka menua pesisir betapi enggau penanggul ngulihka surat beranak sereta kad pengelala.
Direktor Strategi PKR, Sim Tze Tzin madah ba sebuah portal berita aktivis ke nganjung memorandum nya kala minta tulung ari MP Baram Anyi Ngau, tang enda di keibuhka .
Ku Masing, beribu bansa Penan ke lalu bedau bisi kededua iti dokumen nya, ku Masing:
“Engka amat, tang kami benung mutarka pekara nya. Bisi raban ke di bai Menteri ba Opis Menteri Besai Datuk Joseph Entulu deka mutarka penanggul dokumen nya.
“Enti bala Penan tu udah entap pendiau, perintah deka mutarka pekara nya, lalu sida ke ada di Sarawak deka dikelala nyadi rayat Malaysia.
“Kami deka beratika pekara nya lalu enti kriteria nya betul, sida iya deka diterima. Kami tetap kiruhka bansa Penan, enda ngira dini pendiau sida iya,” ku iya.