TERIMA KASIH: Allan (lima kiba) nerima tepa ari Tius pengudah ngulu Pengerami Ketuai Begulai Enggau Rayat di SK Ulu Machan di Kanowit, lemai kemari. Bela dipeda Gramong (tiga kanan).
KANOWIT: Pengundi di sitak Kunsil Nengeri (DUN) Machan enda ulih mejah pemutus Chairman Barisan Nasional (BN) Nengeri Datuk Patinggi Tan Sri Adenan Satem ke udah ngenukuka Allan Siden Gramong bediri di penuduk DUN Machan maya Pengawa Bepilih Besai Nengeri (PRN) 2016.
Kaban Kunsil Nengeri (ADUN) Machan Datuk Gramong Juna madah, pemutus nya mega udah dikeaumka Parti Pesaka Bumiputera Bersatu (PBB) sebedau dibantaika Sekretari Besai BN empu Datuk Dr Stephen Rundi Utom ba sebengkah pengerami ke diatur di Kanowit, apin lama ke udah.
“Pemutus nya mega udah disetuju Adenan ke mega nyadi Kepala Menteri kitai.
“Nya alai, pemutus nya udah digaga lalu enda ulih diubah. Allan Siden deka nukar aku lalu tetap nyadi chalun BN ngena tiket PBB di penuduk DUN Machan maya PRN sekali tu,” ku iya rambau Pengerami Ketuai Begulai Enggau Rayat nyerumba penemuai khas iya ke SK Ulu Machan ditu, lemai kemari.
Sama bisi datai Kaban Parlimen Nembiak Malaysia Kanowit Allan Siden Gramong, Pemesai Pelilih Kanowit Katis Noel Nyabong, Pemesai Pemadah Pelilih Kanowit Donny Minggu Ling, Kepala Pengajar SK Ulu Machan Tius Sigi enggau Chairman PIBG SK Ulu Machan Tuai Rumah Kayan Tayu.
Gramong ke mega nyadi Menteri Muda Pemansang Tanah enggau Dagang Temuai (Program enggau Produk) meransang rayat di Ulu Machan nyukung Allan.
“Aku ngarapka sukung kita ditu (Ulu Machan) betunggang sukung ngagai BN sebaka enggau sukung kitai ngagai aku sekumbang 38 taun ke udah.
“Sukung baka nya mega patut diberi ngagai Allan baka kita nyukung aku pengelama semilan penggal,” ku iya.
Gramong madah, pemujur BN di DUN Machan maya PRN 2016 tu beguna amat dikena nentuka atur pemansang baka ngaga jalai ke Ulu Machan ulih mujur agi.
Berebak enggau nya, iya ngelalau rayat terus nyukung BN, laban semina perintah BN aja ke udah mayuh mantu rayat lalu ukai penyakal.
Nangkan nya, iya madahka pelajar endang kunchi pemujur bala anak jemah ila.
“Semina nengah pelajar pengidup komuniti ulih berubah menyana agi sebaka enggau enggau bansa bukai ke udah maju,” ku iya.
Ba pengujung jaku iya, Gramong madah diri ngungkupka pemeri penyampau RM10,000 ngagai SK Ulu Machan.