Dikarang Chris Bishop//
LUNDU: Raban ketuai pupu bansa diperansang ngenataika nama orang seranta ngagai Opis Menteri Pemansang Orang Indu, Ruang Bilik enggau Komuniti (KPWKM).
Menteri KPWKM Dato Sri Rohani Karim madah saup nya beguna ketegal kekadang opis menteri nyangka enda tetemuka sida tu.
“Kekadang kitai enda ngasai diak sida ke seranta tu enda disengkaum dalam program bantu ke bisi disedia KPWKM.
“Berindik enggau nya kitai ngelalau raban ketuai pupu bansa ngenataika nama sida ngagai opis menteri tekala nya ngambi sida ulih dibantu nitihka pematut,”ku iya ba seiti aum pengarang berita pengudah ngulu Kembara Kasih KPWKM di Kompleks Sukan Lundu, kemari.
Ngenang kaul ke sama, Rohani madah Kembara Kasih KPWKM mega sebengkah chara ngiga lalu mantu orang seranta di tetiap pelilih menua.
Ku iya nengah program nya raban menteri kelimpah orang gawa ari KPWKM sereta nengah sukung raban volunteer, sida ulih betemu enggau raban orang ke nerima bantu.
“Tu mih peluang kami betemu enggau penerima bantu, kitai besaup meresi kandang rumah, nebas rumput, ngemanah rumah enggau pengawa bukai.
“Nengah program tu mega kitai nyadang deka tetemuka kes baru ,”ku iya.
Ba program kemari, Rohani enggau raban KPWKM sereta raban volunteer bisi ngelawa ngagai empat buah ruang bilik/rumah ke nerima bantu ngelingi Lundu.
Pengudah Lundu Ku Rohani ke mega Kaban Parlimen (MP) Batang Lupar, kembara nya deka ngejang ke Sri Aman dalam kandang dua hari tu.
Nangkanka nya kembara deka nuju Sibu, Bintulu sereta Miri sebedau ngelawa Labuan enggau Sabah.
Tembu di Sabah kembara nya deka ngejang ke Semenanjung Malaysia lalu disadang ditutup di Bagan Datoh, Perak kena 9 April 2016.
Sepemanjai timpuh Kembara kasih nya , KPWKM deka mandangka pengawa ke udah dikereja tetiap ejensi dalam opis menteri nya ke alai bansal endur ngerijista kes baru bisi mega dibuka.
Nitihka penerang ari Rohani, Perintah Besai melanja RM1.5 bilion ninting taun ba program bantu ungkup 500 iku orang seranta tauka OKU di serata menua.