Dikarang Rengenyan Labang//
KENA MANAH: Jabu nyuaka chek RM120,000 ngagai Kelab Pengelicha Institut Pematih Pengajar Rajang ti diarika Direktor IPG Rajang, Dr. Lambat Lindong enggau bala bukai.
KOTA SAMARAHAN: Kaunsil Penyerakup enggau Pengintu Tanah Sarawak Tanah Sarawak (SALCRA) nengah Tanggungpengawa Korporat Sosial (CSR) udah meri geran sepenyampau RM490,000 ngagai enam gerempung di nengeri tu.
Geran nya disuaka Sapit Kepala Menteri ti mega Chairman SALCRA Datuk Patinggi Tan Sri Alfred Jabu Numpang.
“Kami ti meri geran tu iya nya endang sebengkah ari program Tanggungpengawa Korporat Sosial SALCRA,” ku iya.
Pengawa nyauka chek nya kemari diatur ba Wisma SALCRA ditu.
Enam gerempung nya nyengkaum gerempung ti ngatur pengawa ngemansangka pelajar tauka Jaku Iban, iya nya Kelab Pengelicha Institut Pematih Pengajar Rajang sepenyampau RM120,000 dikena ngatur Program pelajar Jaku Iban IPG Rajang enggau Gerempung Ngemansang Pelajar Jaku Iban nerima geran RM100,000 dikena ngatur Program Pelajar Gerempung Jaku Bahasa Iban (AIDEL).
Nambahka nya, Gerempung Alumni Dayak Universiti Malaya ti ngatur Program Mansang Sarawak Mansang nerima RM150,000; Tetuan Jawatankuasa Sukan, Kebajikan dan Kebudayaan IPTAR (RM30,000) ti deka bejalaika Program Drama MUZIKA IPTAR Samarahan;
Jubli Emas Maktab Perguruan Batu Lintang nerima RM30,000 dikena bejalaika aktiviti Pelajar IPG Batu Lintang lalu AJK Paengelantang Pendiau Enggau Rekreasyen Rayat Saribas nerima RM60,000 dikena bejalaika aktiviti Saribas Club Kuching 2016.
Dulu ari nya semua penerima nya diberi penerang pasal SALCRA ti dipejuraika Menijar Besai SALCRA, Datu Vasco Sabat Singkang.