Perintah BN deka terus chakah bejalaika program pemansang ngambika rayat sama ngasaika pengelantang
BEJADI: Uggah begulai enggau temuai dipebasa ke bukai bela melah kek rambau pengeramai lemai nya.
DEBAK: Perintah Barisan Nasional (BN) deka terus chakah bejalaika program pemansang di kandang menua pesisir nyengkaum ngaduka perengka guna enggau pekara pelajar ke pemaik rayat.
Menteri Kebun Dandang Besai enggau Komoditi Malaysia, Datuk Amar Douglas Uggah Embas madah, pengawa nya dikena nentuka rayat sama ngasaika pengelantang.
“Pemujur BN mai pemansang nengah pengawa ngaduka perengka infrastruktur udah diasaika nyau deka serap menua ditu.
“Nitihka rekod, kitai (perintah) udah mujur ngemansangka nyau deka serap menua bisi perengka guna baka bekal ai beresi, bekal kuasa elekterik enggau jalai alun.
“Runding bala anak kitai mega majak mansang nengah pemintar sida nerima pelajar ti diajar di sekula.
“Pekara tu nyata pengudah bala nembiak sekula ari menua pesisir nyengkaum ari sekula di kandang menua Saribas udah mujur nyapai penyulut peresa nyapai 5A dalam Ujian Penilaian Sekolah Rendah (UPSR) taun nyin kemari.
“Dikena meri peransang ngagai bala sida tu, kami udah besemaya deka meri peransang pelajar penyampau RM1,000 ngagai sida ke mujur teulihka pemutus peresa ke nyulut,” ku iya.
Iya mantaika jaku tu maya bejadika Pengerami Makai Lemai diatur Gerempung Apai Indai enggau Pengajar (PIBG) Sekula Primari (SK) Suri bepalan ba Dewan Perpaduan Debak semak ditu malam kemari.
Tandu iya, sigi udah nyadi tanggungpengawa apai indai meri pelajar ke menyana ngagai bala anak sida sereta enda nejuka ngagai bala pengajar di sekula aja nyeridi ulah anak sida.
“Kemeratka pekara pelajar bala anak kita. Peminta enggau perengka sekula mega patut genap dikena ngenyamaika sida belajar,” ku iya.
“Asil ari pemendar raban pengajar di sekula mega ngayanka pemujur lalu ngemegah ati pengudah empat iku nembiak sekula ari kandang menua nya teulihka pemutus 5A lalu seiku ari sida tu nembiak ari SK Suri.
Berebak enggau pengerami nya, iya mega bisi nyuaka bantu peransang pelajar ngagai empat iku nembiak sekula nyulut ba UPSR 2015 ari kandang menua nya lalu semua sida tu bela nerima RM1,000 seiku sereta ngemendarka agih belanja penyampau RM30,000 iya nya penyampau RM20,000 ari iya empu lalu RM10,000 da agi ari Menteri Muda Pengelantang Pendiau, Robert Lawson Chuat ngagai PIBG SK Suri.
Sama bisi datai Kaban Kunsil Nengeri (ADUN) Saribas, Razi Sitam, Pemesai Pelilih Betong, Friday Belik, Temenggong Bagi Menua Betong, Piee Alwi, pengari Pemesai Pelajar Pelilih Betong, Aleksey Aman sereta raban ketuai opis perintah enggau ketuai komuniti ke bukai.