ENGKILILI: Opis Pengawa Berumah Nengeri Sarawak (HDC) udah nyediaka seiti agi Skim Lon Rumah Panjai kenyau ari taun seiti nyin kemari.
Menteri Muda Pengawa Berumah Sarawak, Datuk Francis Harden Hollis taja pia madahka, duit lon nya ulih dipinta nengah pengawa nulis tauka datai kediri empu ngelawa Opis HDC di Kuching ngambi nemu penerang silik.
Kenu ku iya, peminta lon nya tebuka ngagai sebarang rumah pajai ke bisi ati di nengeri tu nyengkaum pelin rumah panjai ti deka disediaka piak HDC empu.
“Ukai semina nya aja, rumah panjai deka dikemansang tu mega setingkat lalu penyampau bilik dalam sebuah rumah panjai nya bepanggai ngagai sida ke ngempu rumah.
“Begunan rumah panjai mega deka dikemansangka nengah sistem tendar digaga konteriktor ke dipaduka HDC lalu penyampau lon rumah tu urung RM75,000 nyentuk RM80,000,” ku iya.
Iya ke mega nyadi Kaban Kunsil Nengeri (ADUN) Simanggang mantaika jaku nya rambau bejaku bejadika’Program Walkabout’ enggau ‘Program Sesegau 2016’ Renggat Sitak Kaunsil Nengeri (DUN) Simanggang diatur Opis Pemansang Mensia Mayuh (KEMAS) Bagi Menua Sri Aman bepalan di Rumah Japing Gema, Kampung Nyakai, Jalai Paip, Sri Aman, apin lama ke udah.
Taja pia ku Harden nerang, perintah deka meri subsidi penyampau RM25,000 ke alai orang ke minjau lalu sida dipinta semina mayar baru lon nya RM50,000 ungkup timpuh 25 taun.
Nya alai, iya minta peranak rumah panjai ke bisi ati nganjung peminta sida enggau lengkas dikena nentuka piak sida ulih nganjung pemesai ari opis menteri nya meri penerang ke silik agi bekaul enggau lon nya.
“Tang sebedau nganjung peminta, peranak rumah panjai ke bekaul patut nyukat tanah taba rumah panjai sida lalu madah ngagai piak Opis Tanah enggau Survei dikena ngulihka surat pala tanah,” ku iya nerang.
Tambah agi, Rumah Collin di Bakong Miri nyadi ‘Pilot Project’ ungkup skim tu ke alai udah dipenyadika dalam taun seiti nyin kemari.
Nya alai, iya sekali agi minta ngagai rumah panjai ke bisi ati anang muai peluang nganjung peminta duit jali tu.
Sama bisi datai rambau program nya iya nya Mandal Opis Pemansang Mensia Mayuh di KEMAS Bagi Menua Sri Aman, Kelvin Lambai, Kaunsilor Andar Suntai, Kaunsilor Waterkiller James Junit, Ketuai Raban Orang Indu Parti SUPP Simanggang, Ling Siew Hung, Penyanding Penemu Raban Nembiak SUPP Simanggang, Patrick Micheal Dian sereta bala bukai.
Berebak enggau program nya, Harden bisi ngemendarka agih belanja penyampau RM 5000 ngagai Komiti Pemansang enggau Pengelikun Genturung Pendiau (JKKK) Rumah Japing dikena ngaga rumah JKKK sida.