BALA TEMUAI: Sekeda bala lebuh duduk ba ruai rambau program nya.
SIBU: Sarawak Dayak National Union (SDNU) Sibu Unit Batu 16 udah ngatur Program ‘SDNU Begulai Enggau Komuniti Rumah Panjai ba Rumah Singgai, Batu 16, Jalai Sibu-Ulu Oya ditu, bedau lama udah.
Program tu udah digulu Sapit Sekretari Besai SDNU Chambai Lindong enggau kaban SDNU Sibu ke bukai.
Bela bisi datai Ketuai SDNU Sibu Unit Kemuyang, Patros Tandang enggau Ketuai SDNU Sibu Unit Batu 16 Johny Barangan.
Tuju program nya diatur dikena ngeratka kaul enggau kaban SDNU Sibu sereta peranak rumah panjai.
Dulu ari nya, program udah berengkah pukul 9 pagi ke alai semua kaban SDNU enggau peranak rumah panjai beripai meresi kandang rumah panjai.
Kelimpah beripai, kaban SDNU mega mantu bala peranak rumah panjai nya ngisi pom sereta dokumen ti bekaul enggau setipikit pengawa sereta surat tikah.
Kena pukul 6 lemai, Chambai enggau kaban iya lalu dikelalu ngulu program rasmi.
Maya program nya, bisi diatur sekeda licha baka bekaul engagu pengelikun di rumah panjai, ekonomi, pelajar, reti numbuhka SDNU enggau ke bukai.
Sama bisi ngulu program nya Sapit Chairman Parti Sa’ati Rakyat Sarawak (SUPP) Pampang Dudong, Dato Sri Dr Benny Lee.
Ba program nya, Dr Benny lalu nyuaka pemeri ari kuchik iya empu RM1,000 ungkup SDNU Sibu Unit Batu 16.
Bala peranak rumah panjai nya mega bela bisi minta diri nyadi kaban SDNU Sibu ke alai Johny udah nyuaka pom nyadi kaban nya ngagai Chambai.
KE KENANG NUAN: Johny (tiga kanan) nyuaka tepa ngagai Chambai.