KUCHING: Kepala Menteri Datuk Patinggi Tan Sri Adenan Satem ngelalau peranak nengeri tu ngambi terus meratka pengelandik bejaku English.
Ku iya jaku English diatu udah nyadi jaku antarabansa lalu ukai semina diguna raban orang British tauka Amerika tang diguna semua bansa.
“English udah nyadi jaku antarabangsa baik nya ba pekara dagang, sains, teknologi enggau litaricha ke alai ukai pengawa ke manah enti kitai enggai belajar lalu nguasa jaku English.
“Enti kitai enda nemu jaku nya, kitai deka majak tinggal, 10 taun ke belakang,”ku iya.
Iya mansutka jaku tu ba pengawa ngelanchar ‘Books for Asia’ ungkup Program di Sarawak di Begunan Dewan Undangan Nengeri (DUN) ditu, kemari.
Ku iya nambah, mayuh bengkah menua ngangkatka jaku asal diri nyadi jaku lumur satu menua tang enda kala melakangka jaku English.
Beambika chunto menua Singapura, Adenan madah menua nya ngangkatka jaku Mandarin nyadi jaku menua tang peranak Singapura bejaku sereta nulis dalam jaku English.
“Tu meh kebuah aku ngenuku polisi perintah nengeri tu meratka jaku English. Aku enda kiruhka penemu sida di Kuala Lumpur.
“English deka nyadi jaku lumur dua diguna di nengeri tu ke alai sebarang surat ke nuju ngagai perintah tau nguna kededua jaku iya nya jaku Malaysia enggau English,”ku iya.
Ngenang kaul ke sama, Adenan mega madah pengurang nguasa jaku English ngujungka beribu iku graduet enda teulihka batang pengawa nyentukka diatu.
Sida enda diterima gawa ketegal enda ulih bejaku sereta nulis dalam jaku English enggau manah, tandu iya.
Ketegal nya, Adenan pechaya tu mih maya jaku English diangkat nyadi jaku lumur dua di Malaysia ke alai iya deka berandau sentang juluk nya enggau Perintah Besai.
“Sigi enda disangkal Jaku Malaysia deka nyadi jaku lumur satu menua tang nadai salah kitai nguasa lebih ari seiti jaku.
“Aku temegah enggau peranak Sarawak, ketegal ti ulih nguasa ukai semina dua jaku (Melayu enggau English) tang mega ulih nguasa jaku bukai baka ke Iban enggau China,”ku iya.