Sida patut ulih nitihka tanggungpengawa rama berindik ari pangka ekonomi ke enda meruan
// Dikarang Rengenyan Labang //
KUCHING: Kontraktor enggau pemekal ti ngambi bagi dalam program Ngemanahka Rumah 1Malaysia Veteran nengah Strategi Lautan Biru Menua (NBOS) 7 dilalau ngambika enda kelalu ngambi untung lebih agi maya ekonomi ti enda meruan.
Menteri Penyaga Pengelikun Menua (MinDef) Datuk Seri Hishammuddin Tun Hussein madahka, kontraktor enggau pemekal maya ekonomi menua enda manah patut ulih bejalaika tanggungpengawa rama.
“Ekonomi kitai bepusin, diatu kitai benung betapi enggau gaya ekonomi ti enda meruan tang ila bepusin baru ngagai positif.
“Nya alai aku deka mesan raban kontraktor enggau pemekal iya nya aku semina milih sida ti mendingka aku maya napi penusah kelebih agi maya ekonomi enda manah.
“Raban kontraktor enggau pemekal patut bejalaika tanggungpengawa rama sida sereta mantu kitai lalu enda kelalu ngambi untung maya ekonomi ti enda meruan, kontraktor sereta pemekal ti baka tu ke deka dipilih aku.
“Aku meri jaku tangkan ngagai kontraktor enggau pemekal ti madahka diri deka nyaup kami (MinDef) dalam Program Jiwa Murni anang nguji ngambi untung lebih laban penerima ti nganti rumah nya tembu kelalu lama,” ku iya seraya madah udah ngelala bagi kontratktor enggau pemekal ke meri kerejasama ngagai opis menteri.
Hishammuddin mansutka pekara nya dalam aum pengarang berita ba pengawa Nyerah enggau Nerima Program Ngemanahka Rumah 1Malaysia Veteran ke diatur ba Kampung Sikog, Padawan ditu, kemari.
Ba pengawa nya kemari, Hishammuddin bisi nyuaka kunchi rumah ngagai empat iku penerima iya nya Christy Petrom ari Kampung Sikog, Rosmawati (Kampung Menaul, Serian), Veronica (Kampung Taee, Serian) enggau Suuberi ari Ulu Semera, Padawan.
Taun tu Sarawak diungkupka 100 iku orang veteran ke patut nerima rumah nengah program NBOS 7 nya ke nyengkaum 50 dikemanah tauka dibiki sereta 50 buah agi rumah digaga baru.
Taun 2015, semina diungkupka 25 buah rumah digaga lalu 25 buah rumah dikemanah.
Hishammuddin mega madahka, bejalaika program nya maya ekonomi enda meruan endang beguna amat ke pemintar runding sereta saup ari semua ejensi sereta renggat nembiak redak.
“Projek NBOS tu meri besai reti ngagai penerima sereta baka atur program pagi tu ti chukup rami, tu berupai ngayanka ngagai aku iya nya kitai ba pengawa ti betul.
“Nya alai diatu kitai patut berundingka bakani deka ngenyakahka agi program ti baka tu laban program tu besai reti ngagai ruang bilik ke nerima rumah, laban kitai nadai kompromi maya ngaga rumah tu,” ku iya.
Dalam aum pengarang berita ke sama, Menteri Muda Pengerai Mensia Mayuh Datuk Dr. Jerip Susil ti mega Kaban Kunsil Nengeri (ADUN) Bengoh, ngarapka perintah besai terus bejalaika projek dikena mantu raban veteran di nengeri tu.
Ungkup belanja RM50,000 ke sebuah rumah lalu digaga dalam timpuh ke pandak sereta bekualiti, nya chukup ngemuaska ati penerima, ku iya.
“Aku minta program tu ulih terus dipejalaika sereta ungkup belanja ditambahka mayuh agi, laban penerima beguna amat ke rumah ti lantang baka tu.
“Tambah mega, palan endur ngaga rumah tu disediaka pengempu rumah program tu laban sida nadai puku dikena ngaga rumah kediri empu,” ku Dr. Jerip.