MIRI: Urung 122 iku raban penerima renggat keempat ari 11 buah rumah panjai di Ulu Teru, Tinjar nerima duit dividen ASSAR penyampau RM255,812.60 ari pengawa begulai ngemansangka tanah Adat Bansa Asal (NCR) sida enggau Pelita Teru Plantation Sdn Bhd.
Berebak enggau nya mega, sepenyampau 96 iku penerima ari 11 buah rumah panjai nerima surat pemendar sida nyereta projek gempung kerejasama ke mungkur tanah pemesai 313.45 hektar.
“Tu pemansang ekonomi dipejalaika perintah Barisan Nasional (BN) dikena ngubah peranak di kandang menua pesisir di Ulu Teru nengah projek begulai ngemansangka tanah NCR, ke semina ulih dilawa nengah perengka pengangkut sungai,” pia ku Kaban Kunsil Nengeri (ADUN) Marudi, Datuk Sylvester Entri Muran rambau dipebasa bejadika pengawa mayar dividen ASSAR renggat keempat sereta nyuaka surat pemendar ngagai sida ke ngempu tanah NCR ditu, apin lama ke udah.
Rumah panjai ke kena bungkur pengawa tu iya nya Rumah Kalong Goh, Rumah Henry Gomes, Rumah Enggie Grang, Rumah Mathew Sigat, Rumah John Merikan Lukok, Rumah Engkang Sirai, Rumah Marinda Luta, Rumah Francis Ginda, Rumah Peter Lembang, Rumah Pong Imbap sereta Rumah Kompeni.
Sama bisi datai iya nya SAO Lapok, Belayong Pok, Direktor Kaunsil Projek Begulai ADC ke lalu nyadi pengari orang ke ngempu tanah NCR, Pemancha Enggah Muga sereta pengari LCDA.
Nitih ku Entri, ke lalau nyadi ketuai ngemunka projek tanah NCR kenyau ari taun 2006 suba madahka sida nerima mayuh bantah enggau tuduh ari sekeda parti enggau raban ngatika diri ti madahka perintah deka ngerampas tanah NCR sida.
Diatu ku iya, orang ke ngempu tanah NCR nerima nyauka manggai RM8 juta ari dividen ASSAR lalu bayar ninting taun sida naka ke diatu berengkah ari raban keterubah nyereta pengawa begulai enggau menijar kompeni kebun sawit dandang besai tu udah mujur mansutka asil.
Nyadi pengari rayat di Marudi ku iya, iya ukai semina gaga ati meda pemujur dijapai projek pengawa begulai tanah NCR nya tang mega laban ulih mai pemansang ngagai Ulu Teru ke diatu ulih dilawa nengah jalai alun, bisi bekal kuasa elekterik, lalu enda lama agi deka bisi bekal ai ngagai rumah panjai sida.
Entri ke lalu nyadi Menteri Muda Rengka Rama (Bekal Ai) madah, diatu mayuh peranak rumah panjai udah sedar lalu terus meri kerejasama ngagai pemansang berenggat dipejalaika perintah BN ngagai kandang menua sida.
“Aku ngelalau sekeda raban ke agi mantah polisi pemansang perintah BN ngarapka sida pulai baru nyukung sereta bekerejasama enggau aku ke nyadi pengari rayat ngambi pulaika pemaik ngagai raban komuniti menua pesisir,” ku iya.
Ku iya, ngagai sekeda raban ke agi nyakal iya dikearapka nikal pulai lalu begulai enggau iya bejalaika pengawa pemansang laban perintah enda nejuka rayat terus ngasaika penyeranta baka ti dipetenahka sekeda raban.
Bejalaika pengawa ba sitak Marudi, Entri madahka diri ukai semina ngabas rayat maya semak pengawa bepilih aja tang nyauka ninting minggu kenyau ari 20 taun ke udah iya ngaga perambu sereta bejalaika projek pemansang ungkup rumah panjai enggau tumpuk pendiau.
Ku iya, jalai alun, bekal kuasa elekterik enggau bekal ai ke dipejalaika berenggat ngagai kandang menua pesisir di sitak Marudi.
“Semina perintah BN aja ulih mai pemansang ngagai rayat lalu ukai penyakal, nya alai aku ngansak rayat terus betunggang sukung ngagai BN,” ku iya.
Dalam pengawa bepilih ke deka datai tu ku iya, peranak sitak Marudi enda tau enda begempung laban mayuh agi perambu pemansang deka dikemendar, dalam perambu, sereta benung dipejalaika lalu diatu pemerat diberi ngagai mayuh kandang menua kelebih agi di Tinjar, Bakong, Pengelayan enggau Marudi lalu tu pulaika pemaik ngagai rayat.