KUCHING: Kaban Kunsil Nengeri (ADUN) Padungan Wong King wei nyukung penerang Menteri Pemansang Infrastruktur enggau Penyambung Dato Sri Michael Manyin bekaul enggau isu penambah penyampau penusah bebadi ba jalai alun, ti bepun ari kurang perengka pengangkut mensia mayuh di nengeri tu.
Ketuai Pampang Nembiak Parti Rakyat Demokratik (DAP) nengeri nya madah, berindik ari pekara nya perintah patut ngangkatka pemanah sistem perengka pengangkut mensia mayuh di Sarawak dikena ngurangka penusah bebadi ba jalai alun, iya nya ti ngerikod 18.3 puku rata sehari.
Wong ti suah minta sistem perengka pengangkut guna mensia mayuh di mengeri dikemanah, dekaka perintah bejalaika pansik sereta ngiga chara ti pemadu engkeman dikena ngangkatka sistem nya di nengeri tu.
“Iya (Manyin) madahka 18.3 sehari puku rata penusah bebadi ba jalai alun dirikod ketegal kurang tauka suntuk perengka pengangkut mensia mayuh, iya nya penerang ti betul dibandingka enggau penerang ti dikeluarka PDRM (Polis Diraja Malaysia) ti madahka 60 peratus penusah bebadi ba jalai alun nyadi ketegal ari pengilap tauka ulah mensia empu,” ku iya dalam aum pengarang berita ba indu Opis DAP Nengeri ditu kemari.
Berebak enggau tu Wong madahka perintah nengeri deka bulih empat penguntung tauka pemanah nyema sistem perengka pengangkut mensia mayuh dipejalaika ba tetiap mengeri di nengeri tu.
“Keterubah pengelikun ba jalai alun ulih dikemanahka agi, kedua ulih mantu ngurangka tating belanja rayat ari ti meli kereta kediri empu, ketiga ngurangka pengamah rampa menua, ngerembaika agi produktiviti mengeri nengah chara ngurangka penanggul penyekut ba jalai alun,” ku iya.
Nya alai ku iya, Manyin patut chakah agi ngenukuka pemanah sistem perengka pengangkut mensia mayuh awakka ulih meri pengelantang ngagai rayat kelebih agi di mengeri.
Minta ungkup belanja ari perintah besai dikena bejalaika sistem nya ku iya, nya ulah ti pasif enggau ngelubahka pejalai sistem perengka pengangkut mensia mayuh di nengeri tu.
“Gaya ekonomi menua enggau reputasyen atur belanja di baruh Menteri Besai deka ngemarka peminta ungkup belanja ari perintah besai,” ku iya.
Iya meri penemu ngagai Manyin enggau perintah nengeri ngambika ngemeran polisi baka di nengeri Pulau Pinang enggau Selangor ti nyendiaka servis bas enda bebayar ngagai rayat.
Beduduk ari pekara nya, Wong madahka sida deka nganjung surat meri penemuai basa ngagai Manyin ngambika ulih berandauka pekara nya sereta ngarapka ulih betemu pengudah Taun Baru China ila.
“Bajet perintah nengeri Pulau Pinang 10 kali kurang ari Sarawak, nya alai enti Pulau Pinang ulih ngemeranka polisi nya,aku arap bendar Sarawak mega ulih ngemeranka chara nya,” ku iya.