SRI AMAN: Kaban Kunsil Nengeri (ADUN) Lingga, Simoi Peri ngansak raban ketuai komuniti ngambika chakah agi nerangka reti pemansang ngagai rayat di kandang menua ke dipegai diri.
Ku iya, rayat beguna amat ke penerang silik sentang polisi perintah ngambika enda mudah tekuing runding maya ninga jaku manis sekeda raban.
“Kitai ke dichiri nyadi ketuai kampung, Penghulu, Kaunselor, Tuai Rumah sereta ketuai Komiti Pemansang enggau Pengelikun Genturung Pendiau (JKKK) patut ngiring nembiak redak kita sereta nerang silik reti pemansang ngagai sida.
“Terangka silik sentang polisi perintah ngagai nembiak redak kita, ngambika sida nemu sebarang pemansang iya ke benung sereta deka dikemansangka ba kandang menua kita. Kita tu mih nyadi jematan penyambung antara perintah enggau rayat,” ku iya.
Iya mantaika jaku tu rambau Program Sembang Petang begulai enggau Peranak Kampung Pangkat Stumbin bepalan ditu, apin lama ke udah.
Berebak enggau nya, Simoi mega ngansak raban ketuai komuniti ngambika terus nyaup perintah ngubah peragam runding rayat bekaul enggau projek pemansang.
Ku iya, diatu mih maya iya raban komuniti di menua pesisir enggau di mengeri patut berundingka pekara pemansang ke patut digaga di kandang menua diri.
“Pekara tu beguna amat laban pemansang di sebengkah kandang menua ulih ngangkat tikas pengidup komuniti. Barang sapa ke nulak sigi deka rugi,” ku iya.
“Nya alai, kitai ngarapka raban ketuai komuniti ulih mai rayat nyukung pemansang ke udah, benung sereta deka dipejalaika perintah.”
Sama bisi datai iya nya Pemesai Opis Pekara Khas (JASA) Sarawak, DUN Lingga, Sulaiman Amut, Ketuai Kampung (KK), Kampung Pangkat Stumbin, KK Muhammad sereta raban JKKK ke bukai.