KUCHING: Perintah Sarawak begunaka awak enggau timpuh ke lama kena berunding enggau Perintah Besai senentang peminta mayuh agi kuasa enggau belanja.
Berindik ari nya, piak penyakal enda patut minta pemutus diberi tekala nya, ku Ketuai Pengawa Pemadah Parti Pesaka Bumiputera Bersatu (PBB) Datuk Peter Minos, ungkup Pengawa Bepilih Nengeri (PRN) ila, ke mega seiku ari veteran PBB kemari.
Ku iya, piak penyakal nyau suntuk penemu deka dibantai nya alai sida berengkah bejakuka pekara selebubu ngapa.
“Sida bela nemu pengawa tu begunaka awak enggau timpuh runding ke lama enggau Kuala Lumpur sereta Putrajaya ngulihka mayuh agi agih belanja enggau kuasa tang agi mih sida nagih pemutus diberi tekala nya. Enti sema sida ngempu kuasa, baka di Pulai Pinang, Selangor enggau Kelantan, sida mega enda nerima pemutus tekala nya ari Putrajaya.
“Parti Tindakan Demokratik (DAP) enggau Parti Keadilan Rakyat (PKR) tu naka penambap, bangat enda ulih berunding tauka bejaku ngena logik akal. Baka ni kitai deka bebasaka sida tu. Sida enda meda pekara tu ngena pemintar runding. Petalat sida tu semina masau jam aja,” ku iya.
Iya mantaika jaku tu nimbal berita ke bisi ayan ba surat kabar kemari ke alai Chairman DAP Sarawak, Chong Chieng Jen madah, Kepala Menteri Datuk Patinggi Tan Sri Adenan Satem enda teulihka pemujur ba peminta nikika bayar royalti minyak enggau gis ari lima ngagai 20 peratus ari Perintah Besai.
Ku Minos, Parti Islam Se-Malaysia (PAS) Kelantan chukup lubah bejalaika pengawa, nyengkaum dalam pengawa pemansang ngujungka nengeri nya nyadi nengeri pemadu seranta di menua tu.
“Nama jaku ari piak penyakal sentang pekara tu? Di Pulau Pinang, enti sema nuan ukai penyukung DAP, sebarang peminta deka dilanjar tauka enda dikeibuhka. Pia mega di Selangor, enti sema nuan ukai kaban PKR, nuan tau ngadang diri betapi enggau pemar.
“Sida tu ulih ngemelika pangan diri. Baka ni sida (DAP Sarawak) tau ngamahka nama Kepala Menteri sereta ngarapka sida ulih ngelepaska diri. Sida patut nyeremin pendiau diri dulu,” ku Minos.