Ba RMK11 tu mega industri kayu patut chakah ngena inisiatif engkeman nyungkak penyampau eksport
// Dikarang Chris Bishop //
DIRIKOD DITU MAGANG: Sarudu (kanan) nyuaka bup ‘Balanced Scorecard’ ngagai Awang Tengah ba atur pengawa Gempuru Ninting Bulan 2016 PUSAKA kemari.
KUCHING: ‘Perbadanan Kemajuan Perusahaan Kayu Sarawak’ (PUSAKA) nagit teulihka asil eksport ba tikas RM8 nyentuk RM10 biliun setaun ungkup timpuh lima taun ti deka datai, ku Menteri Pengatur Pengeraja Asal enggau Rampa Menua II Datuk Amar Awang Tengah Ali Hassan.
Ngemujur juluk nya, iya netap nengah polisi enggau inisiatif engkeman ke disediaka Perintah Nengeri, PUSAKA dalam timpuh Atur Pemansang Malaysia Lumpar Ke-11 patut ngaga pelin ke tau ngangkat ‘indeks nilai tambah’ ari 10 nyentuk 40 peratus.
“Industri kayu di nengeri kitai diatu ngenatai asil eksport penyampau RM7.2 biliun ninting taun lalu bisi nyendiaka urung 50,000 peluang pengawa.
“Asil eksport tu datai ari kayu batang ke ditebang ba kampung tropika Nengeri Sarawak, iya nya enda kurang ari 7 juta meter padu setaun pengudah diproses.
“ Pukul rata, nilai tambah ke diulih ari tiap semeter padu kayu batang pengudah diproses iya nya RM1,020,’”ku iya.
Awang Tengah mansutka jaku tu rambau ngulu Gempuru Ninting Bulan PUSAKA 2016 ke diatur di Dewan Seminar PUSAKA ditu, kemari.
Iya ke mega Menteri Perengka Guna enggau Pemansang Industri nambah, enti nilai tambah nya ulih nyapai tikas ari 10 nyentuk 40 peratus, asil eksport ari industri kayu nengeri deka manggai entara RM8 nyentuk RM10 biliun.
Ku iya, pelin enggau pemansang perengka guna ba industri kayu sebengkah pekara ti berat ngambi tau matak mayuh agi pemeranak puku ke nengeri Sarawak.
“Penyanggup pemeranak puku ari dalam enggau luar menua ngaul diri ba industri kayu disadang ulih ngangkat asil eksport ngelui ari RM8 biliun ba RMK-11,” ku iya.
Ngenang sentang pekara ke sama, Awang Tengah madah, industri kayu nengeri tu enda napi seberang penanggul enti Perintah Malaysia begulai enggau 12 bengkah menua nyain Sempekat Kunsi Trans-Pacifik (TPPA).
Iya ke mega Chairman Lembaga Pengurusan PUSAKA madah TPPA deka nyendiaka makit ke besai kelimpah ari ngurangka duti import produk ari 12 bengkah menua.
Ba pengerami nya, iya mega bisi nyuaka setipikit ngagai raban penyereta ti mujur nembuka Kus Latih Kereja Kayu PUSAKA ke diatur di Tanjung Manis.
Bela datai Menijar Besai PUSAKA Datu Sarudu Hoklai.