KUCHING: Palan mandangka asil kraf jari bejait ke dikumbai ‘Handmade Market’ deka dibuka di nengeri tu lalu nyadi palan ungkup orang indu ke deka mandangka bepengelandik dalam seni bejait kreatif nyual produk diri.
Menteri Pengintu Pengelantang Pendiau, Orang Indu enggau Pemansang Ruang Bilik Datuk Fatimah Abdullah madahka konsep ti disadang ulih Gerempung Bejait Seni Kreatif Malaysia seiti pengawa ke manah laban beratika mayuh orang indu di Sarawak ke bisi ngaga pengawa nya.
“Perintah Menua nengah opis menteri kami deka nyukung konsep tu ngambika ulih meri peluang ngaga sida ke landik bejait ulih nyual produk gaga diri empu.
“Enggau chara tu, iya dikearapka ulih mantu orang indu di nengeri tu nambahka penatai pemisi sida sebilik,” ku iya seraya madah deka ngepunka program tu kena 5 Februari tu ila.
Iya madah munyi nya ba aum media pengudah ngelaluka penemuai ari Gerempung Seni Bejait Kreatif Malaysia ti betuaika chairperson gerempung nya, Fully Chye Goet Lee di opis menteri nya di Begunan Baitulmakmur di Petra Jaya, ditu kemari.
Lebuh nerang pasal konsep tu, Fatimah madahka ‘Handmade Market’ tu nyerumba sebuah pampang ti deka dibuka ba palan bebeli barang lalu iya digaga urung empat kali setaun (tiga bulan sekali).
“Kami berundingka deka muka pengabis mimit urung 50 buah kedai lalu maya iya dibuka semina lima hari dalam seminggu aja,” ku iya.
Naka tu, iya madah bisi urung 500 pemungkal pengawa bejait seni kreatif bisi di menua tu, lalu dalam timpuh nya, urung 200 iku dilatih nengah Gerempung Pengawa Bejait Kreatif Malaysia lalu 360 iku dilatih baruh pengawa latih nya di Wisma Wanita.
Chye lebuh nandu jaku Fatimah madahka seni bejait diatu narit ati mayuh indu deka ngaga pengawa nya.
“Mayuh pemungkal ke ngaga pengawa baka tu bala sida indai orang sereta indai tunggal.
“Sida iya belajar ukai semina pengerindu ngaga seni nya tang ngambika ulih nambahka penatai pemisi,” ku iya.
Berindik ari nya, Chye ngarapka palan ‘Handmade Market’ deka nerima sukung ari palan bebeli barang di menua tu, ngambika pengawa ulih dikemansangka besai agi.
Ku iya, diatu semina ngarapka timbal ke manah ari palan bebeli barang lalu enti nerima sukung nya, sida iya nyangka ulih muka palan nya kena bulan Mei tu ila.
Nimbal jaku Chye nya, Fatimah madah palan pengawa latih di Wisma Wanita mega deka ngaga kus Spa sereta Berurut berengkah ari 5 Februari tu ila, lalu nangkan nya nambah mayuh agi kus baka Kus Berapi Kulinari, Kus Bejait Kreatif sereta Kus Nganta.
Berindik ari nya, iya ngelalau orang indu di serata menua tu sama nyereta kus baru tu.
Orang indu ke nyereta kus tu deka disediaka endur bemalam nadai bebayar, nyengkaum belanja makai semua nya ditanggung perintah,” ku iya lalu nandu baru pemerat deka diberi ngagai ruang bilik ke kurang penatai pemisi.
Sida ke deka nyereta kus tu tau telefon nuju Grace ngena lumur 019 886 5552 tauka Siti (013 849 8433).
Sama bisi datai, Direktor Biro Wanita Sarawak Noriah Ahmad.