KUCHING: Peranak ke diau ngelingi Bukit Begunan baka Selanjan, Empelanjau, Kara enggau Bangkung minta perintah ngadu manah alai ke runtuh dia.
Nitihka penerang ari Chairman DAP Bukit Begunan Alexander Frusis, penusah nya nyadi kenyau enam bulan ke udah lalu nyentuk diatu lalu bedau dikemanah.
“Ripot ari seiku tuai rumah ti madah jalai nya udah runtuh kenyau enam bulan ke udah bisi dikenatai ngagai DAP Bukit Begunan.
“Naka diatu jalai nya mengkang bedau dikemanah lalu ngeruga pengelikun orang ti suah betengahka jalai nya kelebih agi maya malam hari,’ ku Alexander nengah sepuchuk surat penerang berita.
Alexander madah bisi kala nyadi penusah mit ketegal jalai nya sigi ditengah sida ti deka nurun ke pasar Lachau.
Ketegal ti tusur, bengkah jalai dua lurung nya diatu udah nyadi seiti lurung aja, tandu iya.
Berindik ari nya, Alexander minta ejensi ke megai tanggungpengawa mutar lalu ngemanah jalai nya sebedau nabanka sekeda nyawa orang ti nguna jalai nya.