Genap penanggul rayat di 187 buah genturung pendiau ditu endang seruran deka diputar enggau naka ulih
ENGKILILI: Kaban Kunsil Nengeri (ADUN) Engkilili Dr Johnical Rayong Ngipa ngutuk raban orang ke majak ngumbai iya enggau Barisan Nasional (BN) puntan mai pemansang di konstituensi iya.
Seraya ngenggaika tuju raban orang nya ke tau digelar ‘pendikar kedai kopi’ iya madah chukup sinu nyema rayat arapka jaku petenah orang nya.
“Nya alai, aku ngelalau raban orang tu umbas mih bejaku nyebut utai ke enda betul nya. Nadai rayat buta meda pemansang ke udah chukup mayuh di DUN tu,” ku iya rambau program nyuaka chek di Rumah Isau, Gelong, Lubok Antu ditu, ensana.
Bela nyempulang pejalai iya Penghulu Inchang Anchih, sereta sekeda bala kaunselor enggau tuai rumah.
Iya madah diri udah nguna bejuta ringgit dalam setaun ungkup pemansang di DUN tu lalu deka bebendar bejalaika pengawa seagi rayat begunaka iya.
“Ari utai ke mit baka musik, atap nyentuk ke jalai raya, bekal ai enggau karan udah enggau benung dibai ngagai semua menua di DUN tu lalu nadai bisi dikemelu.
“Ambika chunto sebedau tu kitai enda nyangka bisi jalai raya ke Ulu Skrang tang diatu jalai raya nya udah ayan ba mua mata. Pia mega bekal karan enggau ai,” ku iya.
Nangkan nya, ku iya genap penanggul rayat di 187 buah rumah panjai enggau genturung pendiau Melayu deka dikemansang enggau naka ulih sereta deka dibai ngagai piak ke bekaul.
Iya madah, tanggungpengawa iya majak mudah maya Kepala Menteri Datuk Patinggi Tan Sri Adenan Satem datai enggau polisi pengawa ke chukup ngemeratka menua pesisir.
“Kami udah dipinta iya chakah agi bejalai enggau mantu rayat enggau naka ulih. Nya alai, nadai kebuah kitai nulak sereta lari ari pengawa BN,” ku iya.
Berebak enggau nya, iya mai rayat ngambika seruran semak enggau perintah lalu anang ngelakka diri tekuing runding ninga jaku petenah ke ngumbai iya ukai pengari BN.
“Aku mengkang bediri di DUN tu ngarika BN, nyadi aram mih nitihka aku ngetanka konstituensi tu sereta meri mandat besai ngagai Adenan terus ngiring nengeri tu sepenggal agi,” ku iya.
Ba program nya, Dr Rayong bisi nyuaka geran MRP ngagai Gerempung Indu Rumah Isau Gelong penyampau RM7,000 lalu Komiti Pemansang enggau Pengelikun Genturung Pendiau (JKKK) nerima RM5,000.
Iya mega bisi nyuaka bantu wang RM1,000 ungkup komiti chapel rumah panjai nya bebelika mangku baru.