Dikarang Chris Bishop //
KUCHING: Tiga buah rumah panjai di Ng Batang, Krian, Saratok ti dituntung penusah tanah tusur nerima bantu ari Opis Pengintu Pengelantang Pendiau Mensia Mayuh (JKM) kemari.
Nitihka penerang ari Pemantu Pengintu Pengelantang Mensia Mayuh Pelilih (PKMD) Saratok, Sukarni Abu Kassim, ketetiga rumah panjai iya nya Rh Apang, Rh Julie enggau Rh Endit.
‘Penusah nya nuntung 53 iku orang ti nguan 10 pintu Rh Apang.
“Rh Julie penyampau 10 pintu diani 47 iku orang lalu Rh Endit ke bisi 20 pintu diani 140 iku orang,” ku iya.
Iya mansutka jaku nya rambau nyuaka bantu ba palan penusah di Jalai Ng Batang Ulu Krian.
Penusah tanah tusur nya nyadi kena 31 Disember 2015 tu tadi lalu ngujungka peranak ari ketetiga rumah panjai putus atur penyambung.
Kelimpah JKM, ejensi bukai bela besaup meresi jalai ke dibungkur tanah tusur pemanjai 25 – 30 meter ti bela mai pun kayu enggau batu.
Taja pia, penusah ke nyadi bepun ari gaya hari ti majak ujan nya enda nabanka nyawa.