Taja pan penumbuh sitak baru tu disakal PKR, Bidayuh mega beguna sebaka enggau bansa bukai
// Dikarang Rengenyan Labang //
GAGA: Penerima surat pala tanah di baruh Seksyen 6 enggau Seksyen 18 Kanun Tanah Negeri gaga ati udah nerima surat pala tanah, begambar bebala mayuh enggau Adenan sereta ke bukai.
SERIAN: Barisan Nasional (BN) ngungkupka dua (2) ari 11 sitak Kunsil Nengeri (DUN) ke baru ngagai bansa Bidayuh maya Pengawa Bepilih Besai Nengeri ti Ke-11 (PRN11) tu ila.
Kepala Menteri, Datuk Patinggi Tan Sri Adenan Satem madah, bansa Bidayuh sama beguna sebaka enggau raban bansa bukai di nengeri tu.
“Aku udah nambahka baru penyampau sitak DUN ungkup orang Bidayuh iya nya DUN Serumbu enggau Bukit Semuja kena nambahka enam DUN ke endang udah bisi baka DUN Tebedu, Kedup, Tarat, Tasik Biru, Opar enggau Bengoh.
“Parti Keadilan Rakyat (PKR), parti penyakal enda setujuka kitai nambahka sitak baru orang Bidayuh. Sida mai pekara tu ngagai kot laban madahka nya enda sah.
“Ingat maya PKR datai kimpin, tanya sida nama kebuah enda setujuka pengawa nambahka sitak DUN baru ungkup Bidayuh. Kebuah iya laban sida takut ke orang Bidayuh sereta tebal agi orang Bidayuh nyukung BN,” ku iya.
Adenan mansutka pekara nya lebuh bejadika Majlis Penyerahan Warta Rizab Gunasama Bumiputera Seksyen 6 Kanun Tanah Negeri di Bawah Inisiatif Baru Tanah Hak Adat Bumiputera dan Majlis Penyampaian Surat Hak Milik Kampung Tradisi Seksyen 18 Kanun Tanah Negeri ti diatur Opis Tanah enggau Survei (JTS) ba Dewan Masyarakat Serian ditu, kemari.
Iya ti nyadi Chairman BN Nengeri madahka nambahka dua sitak DUN baru ungkup raban bansa Bidayuh sebengkah ari pemutus ti digaga BN ke ngemeratka raban bansa Bidayuh.
Ku iya, perintah udah ngamatka semaya iya nya nyadika Serian seiti agi bagi menua di nengeri tu ke diuan tebal agi raban bansa Bidayuh.
“Sehari tu mega kitai (perintah) ngamatka semaya iya nya ngeluarka surat pala tanah enggau rizab.
“Bisi sekeda piak madahka perintah ngerampas tanah, ngeluarka surat pala tanah dikena perintah belawa lalu mayuh jaku tuduh bukai pasal perintah, tang seharitu kita nemu saut tauka pengamat iya,” ku iya seraya madahka perintah enda bulaka semaya sereta deka terus bejalaika pengawa nyukat tanah di serata nengeri di baruh Seksyen 6 enggau Seksyen 18 Kanun Tanah Negeri ti dipejalaika bererenggat.
Berebak enggau tu iya madahka perintah nengeri tu agi minta royalti minyak seagi bedau bulih nama ke patut, taja pan Petronas nambahka ungkup belanja dikena bejalaika pengawa rama di nengeri tu sereta ngemeratka peranak tauka kunteriktor nengeri nangkup pengawa kunterik ke disediaka kompeni nya.
“Aku ngaku aku bedau mujur minta nambahka royalti ari 5 peratus ngagai 20 peratus ungkup nengeri tu, kitai deka bebendar agi sereta ngenukuka bulih royalti nya tambah mega pengeraja asal nya kitai empu,” ku iya ti minta tambah lima taun agi ngiring nengeri tu nyapai pemujur.
Sama bisi datai ngulu atur pengawa nya, Menteri Pemansang Infrastruktur enggau Penyambung ti mega Kaban Kunsil Nengeri (ADUN) Tebedu Dato Sri Michael Manyin, Sapit Speaker Kunsil Nengeri ti mega ADUN Tarat Datuk Roland Sagah Wee Inn, ADUN Kedup Martin Ben enggau ke bukai.