ENGKILILI: Sarawak Housing Development Corporation (HDC) udah mantaika siti agi skim duit jalai ke pengawa berumah iya nya ‘Skim Pinjaman Rumah Panjang Mesra Rakyat’ kenyau ari taun siti nyin tadi.
Menteri Muda Pengawa Berumah Sarawak, Datuk Francis Harden Hollis madah, duit jali nya tau dipinta nengah chara nulis surat tauka datai kediri empu ngagai Opis HDC di Kuching.
Ku iya, peminta nya dibuka ngagai semua rumah panjai di nengeri tu, nyengkaum pelin rumah panjai ti deka disediaka HDC empu.
“Ukai nya aja, rumah panjai ti deka digaga seringkat aja lalu penyampau pintu dalam sebuah rumah panjai nya tepulai ngagai sida ti ngempu rumah.
“Rumah panjai nya mega deka digaga nengah chara tinda ari kontrektor ti dichiri HDC ke alai penyampau maksimun duit jali RM75,000 nyentuk RM 80,000,” ku iya.
Iya ti mega Kaban Kunsil Nengeri (ADUN) Simanggang bejaku munyi tu ba Pengerami Nyuaka Agih Belanja Projek Khas 2015 ti diatur Parti Sa’ati Rakyat Sarawak (SUPP) Pampang Engkilili begulai enggau Komiti enggau Pemansang Genturung Pendiau (JKKK) Rumah Tak, Merindun Engkilili ditu ensanus.
Taja pia ku Harden, perintah deka meri subsidi RM25,000 ke alai orang ti ngunjau duit nya semina mayar RM50,000 dalam timpuh 25 taun.
Aku meransang rumah panjai ti bisi ati tau nganjung peminta sida enggau lengkas ngambika kami ulih nganjung pemesai ari opis menteri meri penerang ti silik pasal duit jali nya.
“Sebedau ngaga peminta, peranak rumah panjai nya meseti nyukat tanah palan endur ngaga rumah panjai sida lalu dianjung ngagai Opis Tanah enggau Survei ngambika diberi pala tanah dulu,” ku iya.
Ku iya baru, Rumah Collin di Bakong Miri sebengkah ‘Pilot Project’ ari skim ti udah dipenyadi taun siti nyin tadi.
Aku sekali agi minta ngagai rumah panjai ti bisi ati ba skim tu ngambika nguna awak tu ngenataika pemintai sida.
Sama bisi datai maya nya, Pemesai Bomba Sri Aman, Jilin Itar enggau bala bukai.