DIPENYADI: Jamal (tengah) Obed (enam kanan) enggau Taip (tujuh kiba) seretai nungkun dian kelai bejadi pengerami Mantar Krismas.
SIBU: Beserimbai enggau pengerami Krismas ti deka datai, Rumah Grace Itun di Jalai Salim-Stabau ditu udah mujur ngatur program ‘Carolling’ begulai enggau bala ‘Caroller’ ari Gerija Anglikan St John Sibu, kena lemai hari Enam tu tadi.
Program tu betuaika Vicar Gereja Anglikan St John ti mega Archdeacon Utara Sarawak Venerable Canon Jamal Senada ke digulu urung 200 iku bala bukai.
Bela bisi datai maya tu iya nya Sub Deacon Obed George Gomes, Chairperson Women Fellowship Gereja St John Pauline Lamus, Tuai Rumah Grace enggau Chairman Komiti Pengatur Frederick Taip.
Nambahka nya, pengari Sapit Chairman Parti Sa’ati Rayat Sarawak (SUPP) Pampang Dudong Dato Sri Dr Benny Lee iya nya Huong Haw Ching enggau Penghulu Enyang Menchol bela bisi datai maya pengerami tu.
Jamal mega maya tu dipebasa nungkun dian dikena ngelai bejadi Mantar Krismas ba rumah panjai nya.
Pengerami baka tu endang diintu peranak rumah panjai nya beserimbai enggau Hari Krismas ninting taun.
‘Carolling’ sebengkah ari pengawa mantaika lagu Krismas ari sebuah ngagai sebuah rumah panjai ke diatur piak gerija dikena merekat diri sebilik ti bepengarap Keristin.
Pengawa tu ke digulu raban ‘Carolle’ ari raban macham bengkah tikas umur ti betuaika Vicar, paderi tauka pemantu paderi enggau Sub Deacon.
Gerija Anglikan Saint John di Sibu ngatur pengawa tu berengkah ari 29 November ngelawa rumah panjai baikka di kandang mengeri tauka menua pesisir.