Penemu ti pansutka iya udah ngasuh ketuai nembiak redak TERAS ensiban
KUCHING: Bala ketuai nembiak redak ari Parti Tenaga Rakyat Sarawak (TERAS) Meluan berasai ensiban enggau jaku ti dibantai MP Julau, Datuk Joseph Salang Gandum ti madahka TERAS nyaruka runding rayat nengah chara madahka diri kaban Barisan Nasional (BN).
Ketuai TERAS Pampang Meluan Jerry Clement madah, kelimpah ti ngembuan peneleba ba politik, Salang patut nemu reti BN Plus.
Kelimpah ari nya, ketuai BN baka Menteri Besai Datuk Seri Najib Tun Razak enggau Kepala Menteri Datuk Patinggi Tan Sri Adenan Satem nadai bebagi ati ngulu pengerami ti diatur parti nya di serata nengeri Sarawak, ku iya.
Tu mandangka TERAS endang amat kaban parti BN nengah formula BN Plus ti ditengkebang Adenan, ti mega chairman BN.
Ku Jerry, iya minta Salang ngingatka pengerami begempuru ti diatur kena 3 Jun ba Stadium Perpaduan Petra Jaya ditu, ke alai Najib enggau Adenan madah ngagai mensia mayuh TERAS enggau United Peoples’ Party (UPP) nyadi komponen BN tauka parti sereta kaban BN-nengah formula BN Plus.
“Enti kaban TERAS di Meluan saru runding reti nya pengawa KM (Adenan) ngemendarka ketuai TERAS nyadi chalun BN pan sama saru runding?” tanya iya. Iya madah munyi tu ngenang penerang ti dipansutka Adenan ti madahka penyandang sitak Marudi enggau Batu Danau,Datuk Sylvester Entri Muran sereta Paulus Palu Gumbang mengkang nyadi chalun BN ba pengawa bepilih ti deka datai tu ila.
Ku Jerry: “Enti TERAS ukai komponen BN Plus nama kebuah presiden parti kami Tan Sri William Mawan dikangauka Menteri Besai (Najib) ngagai rumah iya di Kuala Lumpur apin lama ke udah ngerami hari pengada iya (Mawan)?”
Iya mega bisi mandangka gambar dikena ngamatka pekara nya. Ku Jerry baru, bedau lama ti udah Adenan meri Mawan belanja RM2 milion dikena ngemudahka iya bejalaika pengawa di sitak Meluan enggau Pakan ke ari baruh pegai iya.
Salang ti nyadi Mandal Presiden Parti Rakyat Sarawak (PRS) mantaika penemu tu ba Rumah Langan Nanga Serau Lijan di Julau bedau lama udah beserimbai enggau pengawa nyuaka geran khas RM400,000 ari Najib ngagai 12 buah rumah panjai din.
Ku iya, PRS semina nyukung chalun ti dikemendar Parti Progresif Demokratik Sarawak (SPDP) lalu ukai ti dikemendarka TERAS ba pengawa Bepilih ti deka datai tu, laban TERAS parti ari luar BN.
Aku mega nemu SPDP udah ngemansutka tiga iti nama dikena ngerampas Meluan ari Sarawak Workers Party (SWP), Wong Judat. Entara sida ti dirintai iya nya siku pengajar, Roland Duat, orang dagang, Belayong Jampong enggau siku ti gawa ngatika diri, Eli Lawai.
TERAS bedau ngerintai sebarang nama tang berita selebubu balat madahka dua iku bisi ati nyadi chalun iya siku staf opis setengah perintah lalu siku ari staf opis perintah.
Wong Judat menang ba sitak DUN Meluan nengah BN-SPDP ba PRN ke sebedau tu tang ningkilka diri ari SPDP sereta nyadi kaban SWP.