KUCHING: OCH Sound Production malam ensanus bejadika Album Laila BJ – Bujang Tuai ke alai pengerami nya dikemujurka Sapit Chairman DAMA Brown Sang Lagan.
Album penanyi OCHSP ari Bintulu tu ngundan 8 buah lagu iya nya Bujang Tuai, Manis Gula Batu, Kain Perecha Biru, Api Penyayau Udah Padam, Joget Guyap-guyap, Seminit Aja, Budo Ke Adai enggau Bujang Rambau Sekula Suba.
Dikerami raban penanyi bukai baka ke Leez Zwita, Karen Libau, Diana An Belikau sereta peminat, album disadang deka ngerichah industri muzik Iban.
Manager OCHSP, Oliver Christie Henry ba jaku pengelalu rambau pengerami netap OCHSP deka majak nempa raban penanyi Iban baka ke udah dipejalaika dalam timpuh lima taun tu.
“OCHSP udah bisi penanyi baru lalu deka mega ngeluarka album Diana An Belikau kelimpah ari album lagu rohani Andrew Bonny James.
“Kitai mega merambu ngaga lagu album Bidayuh ba taun ti deka datai lalu nengah teknologi baru ba industri muzik, kitai pechaya ulih ngeluarka album ti bekualiti,’ku iya.
Ba taun 2015, OCHSP udah ngeluarka tiga album iya nya album Eisner Nala enggau album kolibrasyen enggau Karen Libau sereta Aka Dambai, tandu iya.
Ngarika DAMA, Brown ngenataika puji ngagai OCHSP ketegal ti udah nempa mayuh penanyi Iban ti mujur ba industri lagu Iban.
Ku iya OCHSP ukai semina nempa penanyi ke manah tang mega udah ngeluarka album ti ngembuan stindit ti manah.
“Aku arap OCHSP udah tu deka majak ngeluarka album ti ukai semina manah didinga tang bisi kualiti,’ku iya.
Pekara ke patut diperati tambah Brown iya nya leka lagu, tusun muzik sereta klip video patut ngipakka tema album.
Entara penanyi bukai ti udah kala ngeluarka album nengah perabung OCHSP iya nya Donny Lang, Eisner Nala, Ranee Pat, Leez Zwita, Jessica Remaya, Donny Lang enggau Fidarus Udin.
Pengawa ngelanchar Album Laila BJ – Bujang Tuai ke diatur di seiti hotel ditu nya bela mega dikerami raban ari OCHSP Seruran Merindang, Kaban Pesaka Pemerindang, KBC Event Management, Group Ijau Tatoo enggau bala Dj Radio.