MIRI: Penghulu Sibuti (ungkup bansa Dayak), Sadi Manca, madahka Jambai Jali (ex- Tuai Rumah) enggau raban iya badu mantaika pekara ti tau ngasuh orang ringat ba laman media sosial bekaul enggau isu Tung Huat Pelita Niah Plantation.
“Jambai ukai agi Tuai Rumah lalu semua utai ti dipadahka iya nya bula,…iya udah begempung enggau sekeda NGO Dayak dikena ngulihka pengering ba komuniti China enggau Dayak ditu ngena isu Tanah Adat Bansa Asal (NCR), ” ku Sadi lebuh dikerandau pengarang berita ari The Borneo Post kena Hari Empat tu tadi.
Bela bisi datai nerangka pasal isu nya Tuai Rumah Duat Kalom, Tuai Rumah Jeli Naga enggau sekeda peranak menua ti kala ari baruh pegai ex-Tuai Rumah Jambai Jali, ke enda lantang ati enggau pengawa dikereja iya.
“Sebidang tanah ti dikumbai (Jambai) tanah iya, udah diperintah Kort Tinggi Miri High diempu Tung Huat Plantation laban peranak menua nya nyengkaum (Jambai) empu udah nyain sempekat nyual tanah nya ngagai Tung Huat ke tuju numbuhka ladang,” ku Sadi.
Pekara nya majak mar pengudah Jambai Jali bebadi ba jalai alun kena ngalih hari Hari Empat nyin tadi.
“Iya (Jambai) madahka insiden nya bisi kaul enggau Tung Huat plantation,” ku Sadi.
Jambai lalu ngumbai nya ‘violent attack’ ari Tung Huat, taja pan nya semina penusah bebadi.
Ba ripot iya (pasal penusah bebadi kena Hari Empat), Jambai madahka iya dijamah gangster ti gawaka kompeni sawit nya.
Nya alai, ngambika pekara nya enda nyadi pekara ti tau ngenataika penusah, Penghulu Sadi minta Jambai Jali mutarka penanggul nya nengah chara ke betul ari ti nguna gerup ti ekstrem tauka penyakal dikena ngulihka sukung.