Sepital ti beungkus RM400j nyentuk RM500j nya deka digaga nengah chara ‘third party financing’
// Dikarang Jacqueline David //
TERIMA KASIH: Kadim nyuaka tepa ngagai Zaini pengudah bejadi licha ‘Demand-driven Innovation Project’ ti diatur PPRN Renggat Sarawak di Dewan PITAS UNIMAS ditu, kemari.
KOTA SAMARAHAN: Sepital Universiti Malaysia Sarawak (UNIMAS) ti deka digaga ngena ungkus entara RM400 juta ngagai RM500 juta deka berengkah enda lama agi nengah chara ‘third party financing’.
Ketuai Sekretari, Opis Menteri Pelajar Tinggi Malaysia, Dato’ Seri Ir Dr Zaini Ujang madah, sepital UNIMAS deka digaga nengah chara ‘third party financing’ baka ti udah dipesetuju, lalu ukai ngena geran ari perintah.
“Chara ti dikena nya deka ngempung tiga buah organisasyen baka UNIMAS, UNIMAS Holdings enggau sebuah kompeni ke bekaul ngaga sepital tu.
“Pekara tu deka diputus dalam kabinet ba timpuh ke semak tu. Kompeni nya,UNIMAS enggau UNIMAS Holdings udah ngaga Sempekat Pemereti Ati (MoU) dalam kandang dua minggu ke udah.
“Diatu udah bisi MoU ti ulih dibantai ngagai perintah ngambika ulih diperunding ba timpuh ke semak tu,” ku Zaini.
Iya madah munyi tu ba aum media pengudah bejadika licha ‘Demand-driven Innovation Project’ ti diatur PPRN Renggat Nengeri Sarawak di Dewan PITAS UNIMAS ditu,ensanus
Sama bisi enggau ngulu pengerami nya, Mandal Canselor UNIMAS Prof Dato’ Dr Mohamad Kadim Suaidi, Sapit Mandal Canselor (Hal Ehwal Pelajar & Alumni) Prof Mohd Fadzil Abd Rahman, Sapit Mandal Canselor (Pansik enggau Inovasi) Prof Dr Kopli Bujang, Sapit Mandal Canselor (Akademik enggau Antarabansa) Prof Dr Wan Hashim Wan Ibrahim, Ketuai Unit Pengawa Dagang Opis Menteri Pelajar Tinggi Malaysia, Datin Dr Shahira Hamidon enggau Direktor MARA Sarawak, Tuan Megat Zakarian Megat Ahmad.