NAMA KEBUAH ENDA ULIH?: Masing(empat ari kanan) begambar begulai enggau Snowdan (tiga ari kiba) sereta raban pengemeran seni bansa Dayak di nengeri tu, pengudah betemu sereta berandau nya.
KUCHING: Penanggul nyelak tiru CD enggau VCD ke majak nyadi dalam industri lagu enggau filem Dayak tau bendar ngerugi raban artis di nengeri tu.
Menteri Pemansang Tanah, Tan Sri Datuk Amar James Jemut Masing ngarapka piak ti bekaul chakah agi ngemuntanka pengawa ke enda beradat nya di nengeri tu.
Iya bepenemu, pengelandik kreatif dalam industri nya ulih ngetanka pemansang adat enggau main asal, jaku sereta ulih mantu ngangkatka industri dagang temuai nengeri.
“Opis Menteri Dagang Dalam Nengeri, Koperasi enggau Pekara Bebeli Barang (KPDNKK) patut chakah agi ngiga jalai ngemuntanka pengawa ke enda beradat tu enggau jampat sebedau majak ngelekai…enti menua Singapore enggau Brunei ulih ngetuka penanggul tu nama kebuah Malaysia enda ulih?.
“Sida (KPDNKK) patut bisi berasai malu laban enda ulih bejalaika pengawa enggau manah.
“Kemerat sereta kemeranka kerejasama enggau ejensi penerita adat (PBT) bukai pia mega enggau FINAS ba pengawa ngeluarka lisin awakka ulih mantu mutarka penanggul chelak tiru di Sarawak,” ku iya dalam aum pengarang berita maya ‘Perjumpaan Khas Persatuan dan Artis’ ba opis iya ditu, ensana.
Bisi 30 iku raban seni menua tu sama datai enggau nemuai nya ti diketuaika Chairman DAMA, Snowdan Lawan.
Kelimpah ari nya Chairman PERISAI ti mega seiku produser enggau artis, Embat Lala madah, piak iya betapi enggau mayuh pengerugi ketegal ulah sekeda orang ti nadai beradat, nyelak asil sida iya.
Entara lubuk endur bebeli CD enggau VCD chelak tiru di nengeri tu iya nya di Saratok, Sarikei, Sibu, Miri enggau Bintulu ti ngujungka asil pengawa bejualka CD enggau VDC tulin majak kurang kenyau lima taun ke udah.
“Suba kitai ulih mida entara CD tauka VCD tulin enggai chelak tiru, tang diatu laban bisi kereban teknologi moden sida ulih ngeluarka chelak tiru ti nyauka sama enggau ke tulin nyengkaum kelai hologram enggau mua album.
“Kitai nyual ngagai pemborong urung RM10 laban rega siling CD enggau VCD iya nya RM19.90 ba market tang ke chelak tiru nya mar tauka nyauka sama rega enggau asil asal.
“Artis ke dulu tebilang suba ulih nyual nyentuk 10,000 unit album tang diatu semina 5,000 unit aja, tu mega meri pangka besai ngagai artis ke baru deka nempa nama,” ku iya seraya ngarapka piak ti bekaul ulih meri kerejasama mutarka penanggul nya.
Nitih penerang ari iya, kepenudi bendar berandau enggau piak PBT iya nya taun 2013 lalu kenyau dua taun udah nya pengemeran seni enda dikeibuhka.
Berebak enggau tu iya madah, Karnival Jelajah Artis Sarawak deka diatur berengkah 30 April 2016 di Miri, Bintulu, Mukah, Saratok, Sri Aman, Kuching enggau Sibu ti mungkur 128 iku artis Dayak.
Nya mega sebengkah ari chara ngangkatka industri lagu enggau filem Dayak kelimpah ari chara ngemuntanka penanggul CD enggau VCD chelak tiru ari ti majak nyadi.