SRI AMAN: Menteri Muda Pemansang Menua Peisisr enggau Pengawa Berumah, Datuk Francis Harden Hollis ngelalau Komiti Pemansang enggau Pengelikun Genturung Pendiau (JKKK) agar anang nguna chara ke salah enti deka ngenataika sebana bekaul penanggul ke ditapi ba kandang menua sida.
Ku iya, JKKK bisi mayuh chara dikena mutarka penanggul ba kandang pendiau sida baka minta bantu ari ejensi perintah tauka pengari rayat Barisan Nasional (BN) ditu.
Kami enggai meda JKKK ngenataika sebana nya nengah parti penyakal laban nya tau nyadika isu nyerumba pengawa Bepilih Nengeri (PRN) ti deka datai tu ila, ku iya.
“Enti dekaka penanggul nya diputarka, kenataika mih ngagai perintah laban perintah bisi chara ti patut dikena mutarka penanggul sida,” ku iya.
Harden bejaku munyi tu lebuh bejadi Pengerami Ketuai Begulai enggau Rayat ba Rumah Tutong, Sungai Tandok, Undop Sri Aman, ditu ensanus.
Harden ti mega Kaban Kunsil Nengeri (ADUN) Simanggang nengah awak nya ngelalau JKKK ba kandang menua Sri Aman ngambika seruran ngemas data genturung pendiau sida.
Ku iya, pekara nya beguna amat ngambika perintah nemu pasal pemansang JKKK nya sebedau nyediaka program tauka meri belanja ke tuju pemansang sida.
Nengah pengerami ti diatur Opis Hal Ehwal Khas (JASA) Sri Aman nya mega, Harden lalu ngungkupka belanja RM8,000 ngagai JKKK Rumah Tutong lalu RM3,000 agi ungkup Biro Indu rumah panjai nya.