Sida udah lama ngarapka JTS Sri Aman datai nyukat kelingi lalu meri gazet ngagai tanah di menua nya
SKRANG: Opis Tanah enggau Survei, Sri Aman ( JTS ) enggau sekeda Komiti Pemansang enggau Pengelikun Genturung Pendiau (JKKK) rumah panjai ari Ulu Skrang, Engkilili balat ngarapka tanah adat bansa asal (NCR) sida di menua nya mereka di menua nya ulih disukat kelingi sereta digazet nyadi Rizab Komunal Bumiputera nitihka seksyen 6 Kanun Tanah Negeri.
Sekeda program randau nengah Inisiatif Baru NCR udah diatur JTS, Sri Aman ba sekeda Rumah Panjai dikena meri penerang silik ngagai komuniti Iban ari Ulu Skrang sentang reti pekara bekaul enggau Inisiatif Baru NCR.
Nitihku Pengulu Chaong Empin, iya enggau sida semenua udah lama ngarapka JTS, Sri Aman datai ke Ulu Skrang ngambika nyukat tanah NCR Sida.
“Nyema iya nadai disukat, nya tentu ngenusah anak uchu kami ke deka nemu dini tanah temuda (NCR) aki ini sida ngelama tu,” ku iya rambau sebengkah randau ke diatur begulai enggau JTS, ditu apin lama ke udah.
Nangkan nya, kenu ku pengari JTS ba program ke sebaka, inisiatif Baru NCR endang polisi ke dibantaika Menteri Besai Datuk Sri Najib Razak lalud isukung Kepala Menteri, Datuk Patinggi Tan Sri Haji Adenan Satem dikena ngenukuka tanah NCR kelebih agi di kandang menua tu amat dipenggi raban Komuniti Iban.
“Ba atur keterubah, tanah NCR di Ulu Skrang ke ngembuan urung 21,474 hektar deka disukat kelingi lalu digazet nyadi Rizab Komunal Bumiputara dikena raban Komuniti Iban ke nguan menua Ulu Skrang, Engkilili bejalaika pengawa betanam betupi nitihka seksyen 6 Kanun Tanah Negeri.
“Pengudah disukat kelingi, kita ke ngempu tanah ulih nemu sekalika tanah NCR nya udah kena teresa tauka enda.
“Ba atur kedua, tanah NCR ke udah digazet deka disukat nengah chara kediri nitihka atur sida semenua lalu udah nya deka dikeluarka surat pala tanah nitihka seksyen 18 Kanun Tanah Negeri,” ku iya.
Nya alai, ku iya ungkup pengawa nyukat enggau ngeluarka surat, perintah nadai minta sebarang bayar ari sida ke ngempu tanah NCR.
Kenu ku iya, nadai kebuah rayat nulak polisi ke digaga perintah lalu JTS ngarapka peranak rumah panjai ulih meri keresajama dikena ngemuntangka sida bejalaika pengawa nitihka Inisiatif Baru NCR di kandang menua Ulu Skrang.