Dikarang Jacqueline David//
KUCHING: Sebengkah parti baru ke bisi disebut dalam media rama iya nya Dayak National Party (DNP) diperitaka udah nyendiaka sekeda chalun ti deka ngarika parti nya maya Pengawa Bepilih Besai Nengeri ti Ke-11 (PRN11) enda lama agi.
Nengah suratkabar ‘The Borneo Post’ kemari, lebuh ditanya ngagai Opis Pengerijista Gerempung (ROS), opis nya madah, nadai kala nerima sebarang peminta ari orang ke deka muka parti baru.
Direktor ROS Nengeri, Ken Leben madah, naka diatu, nadai sebarang peminta bisi dituju ngagai opis ROS ditu, kelimpah ari nadai sebarang peminta ari Indu Opis ROS di Putrajaya.
“Enti sema bisi pan, peminta numbuhka parti baru nya ngambi timpuh ke lama endur iya tau dirijista laban peminta nya deka ditapis ROS enggau silik dulu.
Iya nandu baru, enti sema parti nya deka ngerijista diri, nyangka enda chukup timpuh datai ba pengawa PRN11 tu ila.
Taja pia, penerang ari opis ROS madah, parti nya nyangka ulih bediri enti sema bisi parti politik kediatu (ke endang udah dirijista) nukar konstitusyen sida lalu ngena nama parti politik baru, sebaka enggau ke digaga Sarawak Workers Party (SWP) suba.
SWP, sebedau nukar konstitusyen sida, kala nyadi sebuah parti bepalan di Sabah, iya nya People’s Front Party (SPF). Nya alai, nitih penerang ari ROS, enti sema DNP ngena nama parti politik ke udah bisi diatu, sida iya agi sempat bediri maya PRN tu ila.
Nengah media rama kemari, sebengkah penerang ari DNP bisi mantaika berita ti madah, sida deka ngatur Aum Kaunsil Tinggi (SCM) parti nya kena 19 November 2015 tu (hari hari Empat) di Bilik Konferens Corus 1, Hotel Corus (nama lama Ming Court Hotel) di Kuala Lumpur.
Penerang ari media rama madah, Aum Kaunsil Tinggi parti nya deka diatur di Kuala Lumpur, di Hotel Le Meridien, Kota Kinabalu, Sabah kena 21 November 2015.
Nengah poster nesau pasal aum nya mega terit madah, pemberita enda dikemendarka ngambi berita pasal aum nya.
Kelimpah ari nya, nengah media rama nya mega madahka parti baru DNP tu dipelanja seiku ‘billionaire’ ke bekaul enggau seiku orang ke begelar ‘Tun’ enggau Datuk Sri ti kala nyadi orang politik di Sarawak.
Penyendia parti tu betapi enggau PRN tu ila, ngayanka mayuh chalun ke tebal ari sida tu biak-biak sereta bepengelandik, lalu sida tu mega ukai orang ke kala enggau BN, PKR, DAP, PBDS, tauka SNAP.
“Enti sema sida dipilih, parti nya deka ngangkatka hak Dayak ti ngelama tu udah diciping perintah, tanah NCR deka diberi geran lalu meri kelala Pulau Galau sereta Pemakai Menua, nyengkaum nyekat lisin PL enggau kayu batang.
Kelimpah ari nya, manifesto DNP mega nyebut meri peluang pengawa ba opis perintah enda tau enda diberi sama rata ngagai semua peranak Sarawak, lalu ukai ungkup sebansa aja, skolarship mega deka diberi ngagai nembiak Sarawak ti nyulut ba pelajar sereta milih bansa, tang ke batang deka diberi ngagai nembiak ti datai ari ruang bilik ke kurang penatai pemisi.
Antara chalun DNP ke bisi dibantaika kena napi PRN tu ila, iya nya Johnson Bilok (Tasik Biru), John Sireg (Mambong), Resa Bille (Serumbu), Thomas Margie (Kota Sentosa), Soebiandono Andrew (Asajaya), Petrus Simon Awan (Balai Ringin), Petrius Lagan (Simunjan), Dr Nelson Insol Harry (Simanggang), Paul Sumbang (Batang Ai), James Stanley Mikai (Layar), Victor Ason (Bukit Saban), Geoffrey Ganda (Engkilili), Keluton Ukok (Saribas), Polycarp Danson (Krian), Novert Sullang (Kabong), Anthony Ejau (Pakan), Playmond Raynold (Machan), Nick Nabau (Bukit Mas), Lina Kunjat (Bukit Assek), Rentap Salau (Bukit Goram), Elias Lippi Mat (Marudi), Henry S W (Telang Usan), Mathew Umpie (Ngemah), Walter Sela (Bukit Sari), Anthony Badak (Lambir), Jok Padan (Jepak), Bill Kayong (Senadin), Prof Madya John Jambu (Lingga), enggau Dr Lechel Sita James (Bekenu).
Taja pia, Polycarp enggau Lina madahka seduai enda nemu nama diri dichalun kena napi PRN ti Ke-11 tu.