MIRI: Projek Program Pelajar Komuniti (Penan) Kandang Menua Tutoh / Apoh Baram ti dipelanja Petronas ungkup pelajar tumu nembiak mit Penan di lima kandang genturung pendiau nya deka belabuh dalam bulan Januari 2016.
Menteri Pengintu Pengelantang Pendiau, Orang Indu engagu Pemansang Ruang Bilik Datuk Fatimah Abdullah madah, pelajar nya deka belabuh dalam bulan Januari ngena palan ke udah bisi diatu sebedau ngena palan baru ke deka tembu dalam bulan April 2016.
“Projek ngaga palan baru nya deka dipejalaika ba pun bulan Disember tu lalu dipelabaka tembu dalam bulan Mac 2016, lalu nembiak nya kandang projek tu ulih ngena palan baru nya dalam bulan April.
“Taja pia, program tu deka dipajakka dalam bulan Januari 2016 ngena sebarang rengka ti dikemisi diatu sebedau pindah ngagai endur baru,” ku iya madah ngagai pengarang berita pengudah nyadi charmain aum nya begulai enggau ejensi ti bekaul di Bilik Aum Opis Residen ditu apin lama ke udah.
Sama bisi enggau maya nya laki Fatimah ke mega Direktor Biro Servis Pelajar Islam Sarawak, Datu Dr. Adi Badiozaman Tuah, Senator Datuk Lihan Jok, Temenggong Elizabeth Deng enggau bala pengari ari Petronas sereta ejensi ke bekaul bukai.
Ku Fatimah, lima kandang endur ti udah dikelala iya nya Long Jenalong, Long Kerangan, Long Leng, Long Kawa enggau Long Selulong.
Ku iya, 55 iku baka bala pengajar, pemantu pengajar enggau supervisor udah dipilih masuk kus belatih ngelama tiga minggu ti berengkah kena tengah bulan November sebedau dianjung gawa ba lima bengkah endur nya.
“Sida ke dipilh nya ari komuniti Penan empu laban projek tu bekaul enggau peranak menua nya.
“Nya alai, kami deka meda peranak menua tu bisi enggau dikena nentuka projek meri pelajar tumu ngagai kandang menua pesisir ti nadai Taska tauka Tadika tui dipelanja Petronas tu mujur,” ku iya.
Petronas meri RM2.75 juta ungkup projek nya dalam timpuh lima taun meri peluang pelajar tumu ngagai nembiak Penan ti dipejalai sechara teatur nengah tanggungpengawa rama korporat (CSR) Petronas.
Ku iya, pra sekula beguna amat dikena nempa modal mensia ke bekualiti ti dikena nyendiaka diri masuk ngagai pelajar formal di sekula primari.
Kelas nya deka mungkur nembiak ti beumur enam tahun ke barruh sereta ngena kokurikulum pelajar standard ti udah ditetapka.
Bisi 131 kpg Penan di serata Sarawak ke alai semua penyampau sida bisi 16,173 iku ba kandang menua Baram, Miri, Bintulu, Limbang enggau Belaga.