JULAU: Ba menua ke diuan mayuh pupu bansa, jalai pengarap, jaku enggau main asal, pekara pelajar nyadi pugu ke pemadu beguna dikena ngadaka raban nembiak rebak baru ke bepenemu dalam napi mayuh pemar.
Pelobi chalun Parti Demokratik Progresif Sarawak (SPDP) N42 Meluan, Rolland Duat madahka, pangka polisi pelajar menua nyadi pugu pekara dikena ngemujurka pemansang nembiak enggau ngemansangka menua tu.
“Dikena nyapai juluk tu raban pengajar nyadi kedap ba pengawa ngemansangka raban nembiak ngambika terus nyingkang nuju pemansang.
“Juluk deka meda Malaysia nyadi menua maju manggai taun 2020 bepanggai ba penau raban pengajar dalam nyediaka pelajar bekualiti ke mungkur semua pekara nyengkaum inovasyen enggau kreativiti ungkup bala nembiak sekula.
“Kebuah pia laban bala pengajar nyadi keresa ke pemadu beguna dikena ngansah penajam runding nembiak di menua tu,” ku Rolland.
Iya mantaika jaku nya rambau Pengerami Makai Lemai Serakup Apai Indai enggau Pengajar (PIBG) Sekula Primari (SK) Nanga Kara semak ditu, apin lama ke udah.
Urung 300 iku raban apai indai nembiak bisi datai ngulu pengerami nya.
Kenu ku Rolland, raban pengajar patut ngemeratka juluk perintah ke deka meda nembiak menua tu teulihka akses pelajar ti bekualiti.
“Tuju iya ngambika nembiak rebak baru ngembuan pemintar, kreatif, inovatif, mereti, tajam runding sereta ulih besemekih ba tikas dunya,” ku iya.
Berebak enggau nya, iya mega minta ngagai semua piak terus besaup ngurangka penanggul disiplin nembiak ba sekula.
“Pengajar megai tanggungpengawa ke berat bejalaika atur transformasyen sistem pelajar menua seriris enggau polisi ke udah ditempa perintah,” ku iya.
Kenu ku iya, kelimpah nempa nembiak chakah sereta ngembuan pengelandik ke tinggi, raban pengajar mega patut nyikap nembiak siruka diri sebilik, sereta ngembuan ulah ke manah.
“Ngagai bala nembiak, kitai ngarapka sida ulih nyadi orang ti berani napi sebarang pemar ke bisi nuntung.
“Anang nyadi orang ke ngenusah komuniti enggau menua, tang patut nyadi orang ke ulih nyaup ngenegapka menua enggau bansa,” ku iya seraya ngelalau bala apai indai nembiak terus meri kerejasama enggau bala pengajar awakka anak sida tau teulihka penyulut dudi hari.