KUALA LUMPUR: Menteri ba Opis Menteri Besai Datuk Seri Shahidan Kassim ngenadaika orang berikan kena buru raban penyaga panta China maya sida bejalaika pengawa berikan di Beting Patinggi Ali.
Iya ke megai tanggungpengawa bekaul enggau Ejensi Penerit Adat Maritim Malaysia (APMM) madahka raban APMM agi nadai nerima ripot bekaul enggau pekara nya.
Tang taja pia, ku iya APMM deka berandau enggau orang ke mantaika pekara nya enda lama agi ngambika nemu silik pasal pekara nya.
“Nyema iya amat, atur endang deka dipejalaika nengah Wisma Putra dikena mantah ulah nya, kelimpah ngeneritka atur nengah polisi perintah ke betuju ngemeratka pengelikun orang berikan ari menua tu,” ku iya madah ngagai Bernama, kemari.
Apin lama ke udah, media menua tu bisi ngeripotka Chairman Gerempung Orang Berikan Menua Miri Kaunsilor Jamali Basri madahka, kepenudi raban orang berikan ari menua tu ngelawa beting nya kena bulan Mei tu tadi, pengudah sida suah kena buru raban penyaga pantai China.
Shahidan taja pia ngelalau raban orang berikan anang betangguh ngaga ripot ngagai APMM nyema pekara baka nya amat bisi nyadi.
“Raban kami mega seruran berandau enggau sida ari menua China madahka penemu kitai ti enda setujuka penerang ke ngumbai kandang tasik nya dipenggi sida,” ku iya.
Ngenang silik pasal pekara nya, Shahidan madah Malaysia enda ngetu 24 jam bejalaika pengawa matau kandang Beting Patinggi Ali kenyau dua taun ke udah ngena kapal enggau bilun APMM, Soldadu Tasik Diraja Malaysia (TLDM) enggau Soldadu Langit Diraja Malaysia (TUDM).
Kenyau ari pun taun nyentuk ke diatu, iya madah bisi 12 buah kapal menua luar udah diburu, udah nya 12 kapal orang berikan ari menua Vietnam ke nyelawai kitu ditangkap.
Kena Hari Tiga ke udah, Menteri Luar Datuk Seri Anifah Aman nimbal sentang isu ke sebaka madahka Beting Patinggi Ali ukai kandang menua ke bisi penyarut entara Malaysia enggau sebarang menua.
Menua nya bepalan ba dalam kandang Zon Ekonomi Eksklusif (EEZ) Malaysia bepelasarka undang-undang Konvensyen Gerempung Serakup Dunya Pasal Undang-Undang Tasik 1982 (UNCLOS 1982). — Bernama