MERESI: Peranak Kpg Lurung Chawan 13 Jalai Foochow 4 benung besaup enggau bala bukai meresi pendam SDNU, kemari. — Gambar Chimon Upon
KUCHING: Pendam SDNU tauka pendam Genda ba Lurung Chawan 13, Jalai Foochow Kuhcing ti repa sereta enda dikeibuhka ngelama tu berubah nyadi beresi pengudah pengawa beripai meresi pendam nya dipejalaika sechara beripai kemari.
Ketuai Nembiak Pampang Nembiak Sarawak Dayak National Union (SDNU) ke mega Mandal III presiden SDNU, Churchill Edward Drem madahka udah datai ba maya ke patut pendam SDNU diberesi sereta diintu manah ngambika orang ti ngempu kaban ti dikuburka dia nemu pendam orang ti dikesayauka sida.
“Kami enggai meda pendam tu repa sereta nyadi palan orang ke jai belalai,” ku iya.
“Enti udah ditebas pendam tu deka dipeda beresi sereta dipebasaka. Kami mega arap ulih nagang urang bepansaka pendam tu muai uras ditu ti tau endur nyamuk betelu,” ku iya.
Iya madah munyi tu lebuh nyuaka duit ari SDNU dikena melanja pengawa meresi pendam nya ti diatur peranak Kg Lurung Chawan 13, Jalai Foochow Road ditu, kemari.
Churchill mega ngarapka peranak tumpuk pendiau ke besemak enggau kaban belayan ti bisi dikuburka ba pendam nya numbuhka komiti ngambika ulih besaup ngintu pendam nya.
Ku iya, nengah chara nya sida ulih besaup ngulihka belanja dikena meli perengka sereta ngintu pendam nya.
“Sida mega tau besaup ngerejista nama orang ti dikuburka ba pendam nya nitihka ripih orang ke dulu,” ku iya.
Chairman SDNU Pampang Samarahan, Stanley Belayong Pok ngulurka langgur penemu ngagai komiti nya ngambika ngaga pagar awakka pendam nya enda dikeruga orang sengapa.
Chairman pengatur pengawa beripai nya, Mabong Unggang ari Sarawak Dayak Iban Association (SADIA) Akademi ti nguluka pengawa beripai madahka diri berasai temegah ati meda penatai bala komuniti Iban ti sama berakup besaup meresi epndam nya.
Iya mega tekenyit meda penatai urung 300 iku ti ngawakka diri enggau meresi pendam nya kemari, lalu bisi mega sekeda nya datai ari Miri.
Kami muji pengawa tu sereta meri terima kasih ngagai orang tu udah melanja pengawa beripai ti dipejalaika pagi tu (kemari),” ku Mabong.
Chairman Pampang SADIA Kuching, Datuk Paduka Anthony Nyait Mani ti nyukung pengawa beripai ti dipejalaika SDNU enggau peranak tumpuk pendiau ke besemak madah, tetiap iku patut besaup ngereja pengawa nya dikena meri basa bngagai orang ti dikuburka dia sereta nentuka pendam nya beresi.
“Tu mih maya kitai besaup ngereja pengawa ke pemaik sereta bekelala enggau pangan diri ngambika kita enda sanggu mantu pangan diri agi dudi ila, ku iya.
Entara Ketuai Kampung ti bisi datai mantu kemari iya nya Dennis Sungkok ari Kpg Iban Stampin, Matthew Bandan Gayau, Kpg Tabuan Tengah, Lia Mudet, Kpg Foochow Dayak, Sapit Sekretari SADIA Kuching, Dom Ricky Tujoh, peranak Kpg Lurung Chawan 13 Jalai Foochow 4. Kaban Exco Indu Opis SADIA, Peter John, Pastor Nicholas Ningkau seduai Rimon Guleng enggau raban sembiang Kristian seduai sereta Peli Jumpot ke mega sama nyadi chairman pengatur pengawa nya, Tukang Wang Gagasan Anak Sarawak (GADS), Tajem Sinok enggau Patricia Judin sekretari ke lalu nyadi publisiti GADS.
Pengawa meresi pendam nya dipelanja Indu gerempung SDNU disaup SDNU Pampang Nembiak Samarahan enggau SDNU Pampang Samarahan lalu disukung SADIA Kuching sereta sekeda komuniti Iban di Kuching enggau Samarahan.