KUCHING: Presiden Parti Pesaka Bumiputera Bersatu (PBB) Datuk Patinggi Tan Sri Adenan Satem malam kemari udah ngenukuka tiga iku penyandang sitak Kunsil Nengeri (DUN) ari parti nya deka dichalunka baru maya Pengawa Bepilih Kunsil Nengeri (PRN) ke deka datai.
Adenan ke mega Chairman Barisan Nasional (BN) Nengeri madahka ketetiga chalun ke udah diputuska nya Dato Sri Michael Manyin (ADUN Tebedu), Datuk Roland Sagah Wee Inn (ADUN Tarat) enggau Martin Ben (Kedup).
Kesemua chalun nya ari PBB. Taja pia, chalun ke Tasik Biru enggau Bengoh agi bedau diputuska.
Ku Adenan, kededua penyandang nya, Datuk Peter Nansian Ngusie (ADUN Tasik Biru) enggau Datuk Dr Jerip Susil (ADUN Bengoh) nyangka agi tauka enda kena pilih maya Pengawa Bepilih Besai Menua (PRN) tu ila.
“Taja pia, Peter enggau Dr Jerip, aku bedau ngaga sebarang pemutus. Gawa bebendar agi dalam kandang enam bulan tu ila, lalu meda ni baka nya ila. Nyangka nya agi tauka enda agi,” ku Adenan.
Nansian enggau Dr Jerip bela sapit presiden ngagai Parti Tenaga Rakyat Sarawak (Teras) enggau United People’s Party (UPP).
Iya madah munyi nya lebuh bejaku ba Pengerami Makai Lemai Ulangtaun Ke-60 Gerempung Dayak Bidayuh Nasional (DBNA) di Dewan Serbaguna DBNA ditu, malam kemari.
Ba sentang ketiga iku chalun PBB nya, ku Adenan, nadai kebuah iya deka nukar ketetiga chalun nya.
“Nadai ke buah aku deka nukar chalun Tebedu, Tarat enggau Kedup. Nya alai, Manyin, Roland enggau Martin agi mengkang ngetanka sitak sida iya,” ku iya.
Ngagai komuniti Bidayuh iya madah, komunit nya patut terus nyukung iya kelimpah ari meri lima taun agi ngagai iya.
“Enti kita nyukung aku, sukung mega pengari rayat ke dipilih aku. Tang kita patut nulung aku, laban aku enda ulih ngereja pengawa nya kediri aku aja.
“Beri sukung ngagai aku. Enti dalam kandang dua taun tu mayuh udah pemujur digaga aku, enda ibuh nyebut ni naka ulih dijapai aku dalam kandang lima taun. Enti kita meri aku peluang, aku deka bediri ngarika kita,” ku iya.